Vasina Pfizer. Imajen TATOLI/António Dasiparu

VIQUEQUE, 24 maiu 2022 (TATOLI)–Diretór Servisu Saúde munisípiu Viqueque, Francisco de Carvalho, relata progresu kampaña vasina Pfizer ba prevensaun COVID-19 ba estudante idade 12 to’o 17 iha munisípiu Viqueque.

“Progresu kampaña vasina Pfizer prevensaun moras COVID-19 ba estudante idade hosi 12 to’o 17, ita fó ona doze dahuluk hamutuk 9.623 no doze daruak 7.949,” Diretór Servisu munsipál informa ba Agência Tatoli, iha ninia knaar fatin, Boro-matan, tersa ne’e.

Tuir alvu, vasina sei fó hamutuk 11.490 iha munisípiu Viqueque, nune’e ekipa saúde durante ne’e halo esforsu fó vasina pfizer ba estudante sira.

“Dezafiu daudaun mak tempu udan, hafoin eskola barak maka harii iha foho ida-ne’e maka sai hanesan dezafiu ba ami-nia ekipa saúde sira ne’ebé fó vasina ba ita-nia saúde sira. Dazafiu seluk maka dadus estudante hosi kada eskola dalaruma ita husu dadus ita husu dadus estudante idade 12 to’o 17, maibé profesór sira fó dadus totál fali. Entaun ita halo verifikasaun ema ne’e oituan de’it, maibé ida-ne’e laiha problema, ita iha koodenasaun di’ak ho eskola sira,” nia akresenta.

Notísia relevante: Estudante 13.000 postu Viqueque Villa simu vasina Pfizer

Enkuantu, dadus vasina Pfizer ba estudante hosi saúde munisípiu Viqueque iha abril 2022, kompostu hosi doze dahuluk hamutuk 8.639 (75,2%) no doze daruak 381 (3,3%), booster atinje ona 2.760 (7,4%) no ema ne’ebé seidauk simu vasina Pfizer hamutuk 2.851.

Hosi dadus ne’ebé iha, kada postu administrativu Lacluta ba estudante idade 12 to’o 17 ne’ebé simu ona vasina hamutuk 437 (42,9%) no doze daruak seidauk iha.

Postu Ossu, estudante simu ona vasina Pfizer doze dahuluk 2.035 (78,8%) no doze daruak 381 (14,8%), postu Uatucarbau estudante simu doze dahuluk 873 (80,2%) no doze daruak seidauk iha.

Postu Uatulari, estudante simu ona vasina Pfizer doze dahuluk hamutuk 2.014 (70,7%) no doze daruak seidauk iha, postu Viqueque vila estudante simu doze dahuluk hamutuk 3.280 (83%) no doze daruak seidauk iha.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here