Xefe suku Buruma, Libório dos Santos Freitas. Imajen Tatoli/Natalino Belo.

BAUCAU, 24 maiu 2022 (TATOLI) – Komunidade uma-kain sia hosi suku Buruma, postu administrativu Baucau vila, munisípiu Baucau sai benefisiáriu ba subsídiu Uma Kbiit Laek (UKL) iha tinan ne’e.

Xefi suku Buruma, Libório dos Santos Freitas, hateten, liuhosi Programa Nasionál Dezenvolvementu Suku (PNDS) ekipa verifikadór deside benefisiáriu xefe família na’in-sia kompostu hosi família kbiit laek, defisiénsia na’in-ida, feto faluk no mane faluk mak prienxe rekizitu hodi hetan subsídiu ne’e.

“Prosesu verifikasaun remata ona, ita finaliza ona rekolla dadus ,” Xefe suku Buruma hateten iha Vila Nova, tersa ne’e.

Xefi família na’in-sia ne’ebé sai benefisiáriu mai hosi aldeia tolu hanesan Tasi, Soli-Wa no Ono-Sere ne’ebé kada aldeia sei hetan uma tolu ho medida 48 metru kuadradu.

Nune’e, alokasaun orsamentu hosi programa UKL ba suku Buruma hamutuk rihun $159,318 ne’ebé sei finansia ba infraestrutura hamutuk rihun $153,306 no operasionál rihun $6,012.

Entretantu suku Buruma kompostu hosi aldea haat hanesan Casmuto, Ono-Sere, Soli-Wa no Tasi ho tótal populasaun hamutuk 3.245.

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here