Boxista timor-oan, Delio Anzaqeci Mouzinho. Imajen/Espesiál

DILI, 24 maiu 2022 (TATOLI)— Prezidente El-Marador Boxing Club, Abilio Orlando Santos, kongratula Boxista timor-oan, Delio Anzaqeci Mouzinho, susesu sai segundu lugar iha finál jogu boxe iha Jogu Sudeste Aziátiku (SEA Games, sigla inglés) ba dala-31 tinan 2021. 

“Ha’u fó parabéns ba ha’u nia boxista Delio Mouzinho hosi El Matador, ha’u kontente tebes ho ninian prestasaun ida ne’e, ha’u fiar katak nia sei fila mai treinu iha El Matador, hafoin halo preparasaun diak liutan ba futuru,” Prezidente Modalidade Boxing El Matador, Abilio Orlando Santos, hateten ba Agência TATOLI iha Dili Sportig Benfica, tersa ne’e.

Notísia relevante: Delio okupa segundu lugar boxe SEA Games

Boxista Delio Anzaqeci Mouzinho mánan ho rezultadu KO (knoct out) ho Boxista Hun Kang hosi Kamboja iha rode daruak. Imajen/espesiál.

Nune’e nia husu ba Governu atu kria kompetisaun barak atu kapasita no hasa’e koñesimentu boxista Timor-oan sira atu reprezenta Timor-Leste ho prestasaun di’ak future.

Governu presiza loke matan ba klubu sira tanba klubu maka esforsu-an prodús boxista di’ak hodi oferese ba federasaun  atu reprezenta Timor-Leste ba kompete iha eventu internasionál sira.

“Ha’u espera katak governu ho federasaun  tenke anota ida ne’e atu loke matan netik ba klubu prinsipál El Matador, tanba  klubu El Matador nia boxista mak konsege   halo  duni istória iha SEA Games liuliu hamorin Timor-Leste nia naran,” nia sujere.

Nune’e, nia husu ba joven sira ne’ebé maka  treinu boxe iha klubu El Matador atu kontinua hatudu seriadade iha treinu, nune’e iha futuru bele kompete iha kompetisaun nasionál, rejionál no internasionál.

Biodata badak

Delio A. Mouzinho “Nuhachay” moris iha loron 4 fulan fevereiru tinan 2000, iha Aldeia Tchai, Suku Lore I, Postu Administrativu Lore, Munisipiu Lautem. Oan husi Manuel Mouzinho no Elisa Mouzinho, Oan daneen (6) husi maun alin nain hitu (7).

Atleta hosi modalidade Boxe Timor-Leste, Delio Mouzinho, segunda ne’e, susesu iha nia jogu dahuluk kontra boxe hosi Malázia, nune’e iha direitu absoluta ultrapasa ba faze semi-finál iha kompetisaun SEA Games iha Vietname. imajen/espesial

Boxista Nuhachay hahú tama Ensinu Bazica Filial Tchai iha tinan 2009 too 2014, kontinua tama Ensinu Bazica Central Coro-Asu de Maloru iha tinan 2015 to’o 2017, iha tinan 2018 to’o 2020 Nuhachay tama ba Ensinu Sekundariu Geral Lere Anan Timor iha Lospalos Villa.

Iha tinan 2021 kontinua nia estudu superiór iha Dili Institute of Technology (DIT), foti área Petroleum Engineering, maibé sei iha trimestre II Nuhachay deside hapara nia estudu tanba hakarak tebes promove no dezenvolve nia kareira iha boxing.

Iha tinan 2018, Delio A. Mouzinho “Nuhachay” hahú tama iha vida boxing iha Lospalos, Lereloho no fó treinu husi Coach Elizario Dias Monteiro “Irapere”, Nuhachay tuir kompetisaun dahuluk iha tinan 2019 nunka lakon iha Timor Leste.

 Iha tinan 2020, Boxista ne’e tama ba El-Marador Boxing Club no kontinua treinu to’o selesionadu husi Federasaun Boxing Timor Leste ba tuir Sea Games 2021 iha nasaun Vietname.

Notísia relevante: Delio Anzaqeci “tuku monu” Boxista Kamboja iha ronde daruak

Jornalista  : Natalino Costa

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here