Semáforu iha Supermerkadu Leader nia oin la funsiona. Imajen Tatoli/Natalino Costa.

DILI, 23 maiu 2022 (TATOLI)—Diretór Dirasaun Nasionál Transporte no Terrestre (DNTT), António da Costa, informa DNTT seidauk halo manutensaun ba semáforu iha área Hospitál Nasionál Guido Valadares (HNGV) Bidau tanba empreza sei sosa hela ekipamentu ba semáforu refere.

Notísia Relevante: DNTT hahú halo manutensaun ba semáforu iha kapitál Dili

“Ita-nia semáforu sira-ne’ebé durante ne’e avaria, agora atinji ona 80% tanba iha fatin ida mak seidauk halo manutensaun liu-liu iha área Hospitál Nasionál Guido Valadares. Tanba, nia ekipamentu labele hadia duni, ne’ebé sira (Empreza) aranja hela. Konforme kompañia relata ba ha’u ne’e to’o ona 80%, ne’ebé agora hela 20%,” António da Costa hateten ba Agência Tatoli, iha nia knar fatin, Dili, segunda ne’e.

Semáforu iha área Hospitál Nasionál Guido Valadares seidauk hadi’a, tanba iha ne’ebá nia ekipamentu mak avária, ne’ebé empreza sira sei buka hela nia ekipamentu hodi hadi’a.

“Kompañia sira hadi’a foin semana ida. Semana ida-ne’e ita labele hanoin katak buat hot-hotu tenke hadi’a ona. Tanba, sira hahú hadi’a iha 16 maiu, ne’ebé buat hotu nia prosesu mak nune’e,” nia dehan.

Tanba, nia informa, iha konkursu ne’e empreza manan-na’in mak ba sosa ekipamentu sira-ne’e, hafoin sira mak lori mai monta rasik.

“Ha’u garante kuandu sasan ne’e to’o mai, dala ruma fulan juñu la ramata, semáforu hirak be avaria ka aat ne’e bele hadi’a hotu ona,” nia hateten.

Notísia Relevante: Instalasaun semáforu foun iha Kuluhun-Audian-Manleu atinje ona 30%

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here