Pinta Estrada. Imajen/Espesiál.

DILI, 23 maiu 2022 (TATOLI)—Diretór Dirasaun Nasionál Transporte no Terrestre (DNTT), António da Costa, informa DNTT atu konklui ona pinta estrada protokolu iha kapitál Dili tanba dadaun ne’e sira hala’o servisu hela.

Notísia RelevanteDNTT prevee $722,045.03 pinta estrada iha kapitál Dili 

“Ha’u haree pinta estrada iha dili laran maioria hotu ona, hanesan dalan protokolu sira iha dili laran pinta hotu ona. Konforme sira-nia kontratu fulan tolu, hanesan sira hahú servisu iha abril signifika jullu mak foin hotu, maibé ha’u espera katak la to’o iha ne’ebá, tanba agora daudaun ne’e kompañia sira servisu namanas hela,” António da Costa hateten ba Agência Tatoli, iha nia knar fatin, Dili, segunda ne’e.

Nia informa, empreza sira-nia kontratu ho durasaun fulan tolu (3), ne’ebé sira hahú servisu ne’e iha 04 abril tinan 2022 ne’ebé pinta estrada iha dalan protokolu sira pinta hotu ona, maibé iha estrada área Kuluhun, Hera no Cristo Rei mak seidauk pinta.

“Maibé, agora sira pinta hela iha kantor (DNTT) oin tun ba hudi laran nian, ne’ebé ita-boot sira bele ba haree no observa,” nia dehan.

Antes ne’e, Diretór Dirasaun Nasionál Transporte no Terrestre (DNTT) ne’e informa DNTT prevee orsamentu hamutuk $722,045.03 ba realizasaun pinta estrada iha kapitál Dili no kompañia ne’ebé manan konkursu ba pinta estrada ne’e mak Empreza Hedge Unipesoál, Lda, ne’ebé hahú hala’o ninia atividade pinta estrada ne’e iha 04 abríl no hahú halo teste pinta estrada iha área Comoro.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here