Eis Prezidente Parlamentu Nasionál, Arão Noe de Jesus da Costa Amaral. Imajen /Egas Cristóvão

DILI, 24 MAIU 2022 (TATOLI)—Deputadu hosi Bankada CNRT, Arão Noe, hateten presiza halo revizaun hodi armoniza lejislasaun tolu iha Parlamentu Nasionál ne’ebé vijente hela hanesan lei Organizasaun no Funsionamentu ba Administrasaun Parlamentár (LOFAP), Estatutu Deputadu ho Rejimentu Parlamentu Nasionál.

Nia hatutan, bankada CNRT konkorda no hanoin presiza halo revizasaun hodi armoniza tanba tinan barak ona situasaun balun la kondisiona ona.

“Asuntu ida-ne’e desde ko’alia ona iha lejislatura datoluk kona-ba oinsá hadi’a lei sira-ne’ebé liga ba administrasaun interna Parlamentu nian LOFAP, Estatutu Deputadu no Rejimentu Parlamentu Nasionál. Lejislasaun tolu ne’e presiza armoniza entre sira tanba iha buat barak deteta katak presiza hadi’a ona tanba dezde tempu naruk tinan 10 ona halo aprovasaun,” Deputadu Arão Noe hateten ba Agéncia TATOLI, iha Parlamentu Nasionál, tersa ne’e.

Presiza halo armonizasaun atu nune’e hodi regra balun seidauk estabelese iha ne’ebá karik prátika la’o hela la estabelese iha lei tolu ne’e, tenke armoniza tiha hodi labele perturba bainhira iha Deputadu no Sekretáriu Jerál hala’o funsaun sempre bazea ba regra.

Tanba, tuir nia, Parlamentu Nasionál (PN) mak lejisladór entaun regra sira ba nia an presiza armoniza didi’ak hodi labele kria dezentendimentu.

Tuir Lei númeru 7/2017, 26 abríl, aporva lei kona-ba Pensaun Deputadu no prosede primeira alterasaun lei númeru 5/2004, 05 maiu, kona-ba Estatutu Deputadu no primeira alterasaun lei númeru 1/2007, 18 janeiru, lei númeru 7/2007, 25 jullu, regula respetivamente, rejime pensaun mensál vitalísia ba deputadu no regalia no estatutu titulár  órgaun soberania, primeiru relativamente  ba Deputadu no  segundu  relativamente ba titulár órgaun soberania haat ba  membru Governu, estabelese medida objetivu apoiu mezmu  iha sesaun funsaun públika servisu ba nasaun.

Objetu prezente lei aprova iha anexu, hola parte integrante, lei kona-ba pensaun Deputadu, no  prosede primeira alterasaun Lei númeru 5/2004,  5  maiu, kona-ba  Estatutu Deputadu no Primeira Alterasaun Lei númeru 7/2007, 25 jullu,  kona-ba Estatutu Titulár Órgaun Soberania, no iha lei vijente ne’e iha artigu hamutuk 38.

“Revizaun ba ida-ne’e hanoin iha lubuk ida. Estatutu Deputadu presiza iha regalias balun ne’ebé iha-ne’eba estabelese presiza halo armonizasaun no legaliza tiha iha Estatutu Deputadu.

No barak liu ho de’it rezolusaun PN nian ne’ebé liu hosi Konsellu Administrasaun aprova, ezekuta de’it sein prevee iha regra normál. Tanba ne’e, presiza armoniza tiha atu nune’e bele legaliza, mezmu iha interpretasaun hateten katak buat prátika ne’ebé halo ona seidauk legaliza ne’e legál ona. Maibé di’akliu tau tiha iha estatutu hodi haree ba direitu, dever no responsavilidade,” nia esplika.

Nia fó ezemplu, lei partidu polítiku katak partidu bele skor deputadu ida hosi ida-ne’e mai maibé tenke enkuadra iha Estatutu Deputadu hodi nune’e iha valór regulariza mós ida-ne’e, nune’e nia prosesu atu mai fali iha Rejimentu PN tenke armoniza mós hodi Rejimente prosede lakon Deputadu ida-nia mandatu karik tuir lei partidu polítiku ezije.

Nune’e tenke iha koerensia regra sira ba malu bainhira iha pedidu ruma tama atu lakon mandatu prosesu legál iha ona atu prosede.

Enkuantu, Lei númeru 12/2017, 24 maiu, lei Organizasaun no Funsionamentu ba Administrasaun Parlamentár (LOFAP). Nia objetu, prinsípiu no dispozisaun jerál prezente lei define no regula organizasaun no funsionamentu administrasaun Parlamentu Nasionál, ho objetivu asegura jestaun orsamental, finanseiru no administrativa, hanesan respetivu apoiu tékniku, promove dezempeñu regular no efikas funsaun konstituisional ho legál. Iha lei ne’e artigu hamutuk 80.

Eis Prezidente Parlamentu Nasionál ne’e hateten, Lei LOFAP sekretáriu nian presiza hadi’a tanba uluk iha 2017 altera depois implementasaun hahú deteta katak iha frakeza balun atu hadi’a.

“Ezemplu, asuntu ne’ebé importante liu mak hanesan atu muda de’it funsionáriu ida hosi departamentu ida ba departamentu no fatin seluk tenke iha aseitasaun hosi funsionáriu ne’e, entaun podér xefia lakon tiha hanesan iha sansaun ruma atu foti tenke ho konkordansia,” nia fundamenta.

Nia dehan, tanba iha 2017 fin mandatu lejislatura entaun ladun fó atensaun didi’ak, nune’e agora presiza halo alterasaun mateira nesesáriu ne’ebé temi.

Entertantu, iha Parlamentu Nasionál nia Rejimentu númeru 1/2016, alterasaun dahuluk ba Rejimentu Parlamentu Nasionál nian ne’ebé aprova iha 2009.

Rejimentu ne’e artigu hamutuk 202 ho nia natureza no funsaun mak iha ninia funsionamentu, Parlamentu Nasionál la’o tuir Rejimentu ida-ne’e.

Arão Noe fundamenta, Rejimentu Parlamentu Nasionál haree tempu la’o daudaun presiza hadi’a duni hanesan ohin temi pedidu lakon mandatu Deputadu ida-nia prosedimentu halo oinsá.

Hanesan mós lei impeachment ba Prezidente Repúblika nia prosedimentu rejimentu ne’e oinsá no tenke kompleta tiha hodi bele la’o, se lae iha implementasaun uza de’it maiória mak foti desizaun sein bazea ba legalidade.

Hatán kona-ba mosu interpretasaun la hanesan tuir Rejimentu Parlamentu Nasionál ba prosesu distituisaun meza PN iha tempu liu, nia dehan, presiza halo klaru iha ne’ebá. Se hanesan, tenke haree ba iha artigu 99, númeru 3 konstituisaun hateten klaru katak ajenda plenária ne’e Prezidente Parlamentu Nasionál mak halo liuhosi regra rejimentu tenke rona líder bankada.

“Maibé sé mak halo ajenda ne’e, so Prezidente Parlamentu Nasionál iha artigu 99 númeru 3 konstituisaun agora iha rejimentu PN presiza mós aklara iha pontu situasaun ida-ne’e presiza, tanba konstituisaun mak lei inan ba hotu-hotu entaun ita tenke la’o tuir regra lei inan hodi deskreve iha rejimentu PN, hodi labele iha interpretasaun ne’ebé kontráriu malu iha situasaun ida ne’e,” nia hateten.

Tan ne’e, hanesan Estadu Direitu Demokrátiku buat hotu ne’ebé hala’o ne’e tenke tuir saida mak hakerek iha lei ka rejimentu, la’ós laiha ita bele aprova de’it hodi hala’o, hanoin ida-ne’e labele.

Tanba ne’e, Bankada CNRT prontu kolabora ba diskusaun revizaun ba lejislasaun tolu refere tanba CNRT hakatak konbtribui ba bens-estar fungsionamentu Parlamentu Nasionál.

“Ha’u hanoin ida-ne’e ita sei kontribui tanba problema ida-ne’e ba bens-estár funsionamentu Parlamentu sé-sé de’it mak aban-bainrua sa’e ba Prezidente Parlamentu no sekretária jerál iha ona regra sira klaru ona presiza iha armonizasaun,” nia dehan.

CNRT nia prinsípiu sei kontribui la kontra ema sé no ida haree ba legalidade, nune’e legalidade mak ita armoniza tuir kuadru legál ne’ebé iha.

Tuir nia, inisiativa revizaun ne’e dezde uluk PN inisia ona, tanba ne’e espera iha tempu tuir mai bele kontinua halo diskusaun.

“Buat ne’e ko’alia ona iha tinan ida kotuk oinsá ita hadi’a lei tolu ne’ebé importante liga jestaun Parlamentu nian no inisiativa desde uluk ona. Soke, anúnsiu ona dala hira maibé to’o agora haree prosesu ne’e paradu hela, parese sei iha nivél sekretáriu halo hela ninia draft. Tanba,  normalmente halo ezbosu depois lori mai aprezenta iha lidér bankada no lori ba plenária,” nia hateten.

Enkuantu, antes ne’e, Prezidente Parlamentu Nasionál, Aniceto Longuinhos Guterres Lopes, fó sai katak durante mandatu kinta lejislatura sei fó prioridade ba revizaun ba lejislasaun tolu refere.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here