Prezidente CDTL, Macario Sanches. Imajen/ Media CDTL

DILI, 24 maiu 2022 (TATOLI)—  Prezidente Konfederasaun Desportu Timor-Leste (CDTL), Macario Sanches, husu ba Estadu atu investe ba atleta ne’ebé iha prestasaun di’ak, nune’e kontinua hamorin Timor-Leste nia naran iha nivél internasionál.

“Konfederasaun Desportu Timor-Leste kontinua enkoraza federasaun sira atu prepara nian atleta, no husu ba Estadu atu investe ba atleta sira ne’bé hetan prestaun. Ha’u fó ezemplu kona-ba boxing sira. Rezultadu SEA Games iha Vitname, ita nian atleta Delio Mouzinho bele hakat liubá iha finál, ne’e orgullu bo’ot ida mai Timor-Leste,” Prezidente CDTL ne’e hateten ba jornalista sira hafoin ramata enkontru ho SEJD Abrão Saldanha iha Seonál Dili, tersa ne’e.

Ho prestasaun di’ak ne’e, nia dehan Governu hatudu ona nia protindaun hodi prepara boxista sira ne’ebé iha prestasaun di’ak atu ba treina iha Cuba hodi prepara sira ba iha SEA Games iha Kambodia iha tinan 2023.

“Modalidade sira seluk, ami mós fó hanoin ba Governu, atu investe tanba daudaun ne’e kompañia nasionál no internasioná hakarak kontribui ba investe ba desportu ne’e,” nia akresenta.

SEJD ho CDTL ejize maka federasaun no asosiasaun hotu bele realiza kampionatu nasionál, nune’e atleta sira bele kompete iha kampionatu nasionál no kampionatu internasionál.

Nune’e, CDTL koordena ona ho SEJD atu aban simu atleta sira ne’ebé partisipa iha SEA Games 2022 iha Vietmame tanba aban (25/05) fila hikas mai Timor-Leste.

“Aban atleta sira sei simu direita hosi Vise Ministru Edukasaun, Juventude no Desportu iha Aeroportu Nicolau Lobato,” nia afirma.

Hafoin simu iha aeroportu sei halo komboi ba too iha Ponte BJ Habibie no kontinua ba diresaun Hospitál Nasionál Guido Valadares (HNGV) no sei finaliza Gináziu Dili.

“Husu ba joven sira familia, inan- aman sira, ne’ebé maka iha tempu karik bele asiste hamutuk ho ita nia atleta sira, para bele fó onra ba sira, dignifika sira atu nune’e sira orgullu katak povu Timor- Leste iha sira nia kotuk, tanba sira lori medalla mai Timor-Leste,” nia rekoemnda.

CDTL hamutuk governu prepara ona supreza ba atleta sira liuliu atleta ne’ebé hetan medalla iha Vietname sei hetan prémiu hosi kompañia Telemor tuir kompromisiu ne’ebé antes ne’e sira halo ona ho atleta sira  ho valór osan $500 too $1.000.

Tuir planu iha loron 26 maiu, SEJD ho CDTL sei realiza han hamutuk ho atleta sira ne’ebe partisipa ona SEA Games.

Jornalista: Natalino Costa

Editór     : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here