iklan

BOBONARO, HEADLINE, MUNISÍPIU, SAÚDE

Bebé 78 moris iha sentru saúde Balibo

Bebé 78 moris iha sentru saúde Balibo

Inan sira lori bebé konsulta iha Sentru Saúde Balibo. Imajen Tatoli/Sérgio da Cruz.

BOBONARO, 24 maiu 2022 (TATOLI) – Hahú hosi fulan-janeiru to’o maiu 2022 ne’e iha bebé na’in-78 mak moris iha sala maternidade, sentru saúde komunitária postu administrarivu Balibo, munisípiu Bobonaro, maibé hosi númeru ne’e na’in-rua mak mate iha inan nia knotak.

“Komesa janeiru mai to’o agora inan ne’ebé partu iha 87. Hosi númeru ne’e na’in-78 moris ho kondisaun normál, na’in-sia ita ajuda partu iha uma, depois hosi 87 labarik na’in-rua mak mate” Xefe Sentru Saúde Balibo, Manuel da Cruz, informa ba Agência Tatoli, tersa ne’e.

Hosi inan isin-rua hamutuk na’in-87 iha na’in ualu mak parteira hosi sentru saúde Balibo refere ba partu iha Hospital Referál Maliana (HRM) tanba hetan ameasa ho moras sira seluk nune’e bele salva bebé inklui inan nia vida.

“Ita refere tanba na’in-ida preklamsia, ida tanba bee-manas nakfera sedu, na’in-ida tán tanba partu kleur, depois na’in-rua seluk moris ho kondisaun di’ak,” nia katak.

Responsável sentru saúde komintária ne’e dehan, durante ne’e pesoál saúde no médiku sira nafatin halo atendimentu durante 24 oras bainhira komunidade sira presiza no ba sira-ne’ebé hela ho distánsia dook liuhosi programa liga inan ekipa sira iha postu saúde bele fó partu iha uma.

Maibé tuir nia, bainhira inan isin-rua kondisaun grave liu mak ambulánsia multi-funsaun sei apoia, maske kondisaun estrada la di’ak, maibé hanesan servidór estadu nafatin halo atendimentu hodi salva mortalidade inan no oan.

“Ami-nia fasilidade kompletu no transporte mós mantein, maske nia kondisaun haree hosi laran aat, maibé karreta ne’e sei bele transfere ema ba mai, ne’ebé ami nafatin preparadu ho kondisaun ne’ebé mak iha no sempre prontu iha kualkér tempu,” nia katak.

Haree ba kondisaun karreta ambulánsia multi-funsaun ne’ebé sei bele halo oprerasaun tula pasiente sira, maibé responsável ne’e husu ba Ministériu Sáude atu sosa karreta foun tanba karreta ne’e uza tinan barak ona ninia asesór barak mak maioria la funsiona no kadeira sira mós dodok ona.

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!