DILI, 23 maiu 2022 (TATOLI)—Sekretáriu Estadu Komunikasaun Sosiál (SEKOMS), Merício Juvinal Dias dos Reis ‘Akara’, hateten, índise liberdade imprensa mundiál iha tinan 2022 hatudu Timor-Leste iha progresu di’ak ba bebeik.
“Ohin ha’u mai hasoru malu ho Primeiru-Ministru (PM), Taur Matan Ruak, atu informa durante ita-nia servisu mídia rai-laran hetan valór di’ak iha nível mundiál, tanba tuir índise liberdade imprensa mundiál hatudu katak tinan kotuk Timor-Leste okupa pozisaun 71 maibé agora sa’e ba 17 entre nasaun 180,” Sekretáriu Estadu informa hafoin hasoru malu ho Primeiru-Ministru iha Rezidénsia Ofisiál Farol, segunda ne’e.
Ho rezultadu ne’e, governante ne’e konsidera Timor-Leste nia liberdade imprensa di’ak kompara ho nasaun sira seluk.
“Tanba rezultadu liuhosi aspetu survei indika katak númeru dahuluk ita-nia segurasa ba knaar mídia iha Timor-Leste aseguradu, kuaze 90 resin valór di’ak, ita la halo impedimentu ba knaar mídia iha aspetu ekonomia, sosiál, polítika, no ita mós la halo intervenasaun grave ba konsellu redasaun,” nia akresenta.
Notísia relevante: Uma Komunikasaun selebra loron mundiál liberdade imprensa dahuluk iha PN
Nune’e, durante enkontru, Xefe Ezekutivu hatudu sentimentu orgullu tanba maski Timor-Leste hanesan nasaun kiik, maibé iha liberdade imprensa di’ak liu iha rejiaun Asosiasaun Nasaun Sudeste Aziátiku (ASEAN, sigla inglés).
“Ita tenke mantein ba oin. Agora buat ne’ebé ita presiza hadi’a mak kualidade hakerek, uza termu halo di’ak liután tanba ita sei iha fallansu oituan,” nia dehan.
Aleinde ne’e, iha enkontru ne’e, PM mós orienta SEKOMS hanesan Ministru Asuntu Parlamentár no Komunikasaun Sosiál (MAPKOMS) interinu, atu koordena servisu didi’ak ho Parlamentu Nasionál (PN) kona-ba programa no lei sira ne’ebé mak Governu propoin hodi bele bele tau atensaun.
“Ohin mós Primeiru-Ministru hato’o nia parabens no apresiasaun boot ba dezenvolvimentu mídia iha rai-laran, liuliu ita konsege hala’o knaar di’ak durante selebrasaun 20 maiu 2022 hanesan transmisaun direita iha Palásiu Prezidente Nicolau Lobato no tomada pose ba Prezidente Repúblika foun, José Ramos Horta iha Tasi-tolu. Kooperasaun mídia nasionál no internasionál halo kobertura la’o di’ak durante festa la’o,” Sekretáriu Estadu subliña.
Buat ne’ebé Xefe Governu husu ba mídia mak tau prioridade polítika Goveru nian hodi transmite beibeik ba populasaun atu povu akompaña nafatin.
“Ha’u hakarak husu ita mantein nafatin ita-nia servisu di’ak sira ne’e, atu ba oin ita-nia kualidade ne’e sai di’ak liután,” nia fó hanoin.
Jornalista : Arminda Fonseca
Editora : Julia Chatarina
