Sekretáriu Estadu Juventude no Desportu (SEJD). Abrão Saldanha, sesta foin lalais, halo vizita traballu ba Sentru Foinsa’e Manatuto (CFM).Imajen/ Camilio de Sousa.

MANATUTO, 23 maiu 2022 (TATOLI)— Sekretáriu Estadu Juventude no Desportu (SEJD). Abrão Saldanha, sesta foin lalais, halo vizita traballu ba Sentru Foinsa’e Manatuto (CFM) hodi rona direta preokupasaun juventude sira-nia iha sentru refere.

Biban ne’e, Diretór Sentru Foinsa’e Munisípiu Manatuto, Jorge Geronimo Soares, hateten problema ne’ebé juventude Manututo-oan enfrenta mak laiha transporte hodi fasilita atividade foinsa’e sira-nian no ladun iha espasu hodi akumula joven barak hodi promove sira-nia talentu

Imajen/Camilio de Sousa.

“Ami nia-preokupasaun mak transporte laiha hodi fasilita ami nia atividade no mós fatin formasaun kloot liu hodi akumula ema barak,” Jorge Geronimo hateten ba Agência TATOLI hafoin vizita traballu hosi SEJD iha Suku Sau-Manatuto.

Iha fatin hanesan, Reprezentate RAES Hadomi Timor-Oan (RHTO) Munisípiu Manatuto, Domingos Soares Doutel, dehan iha munisipiu Manatuto iha ema ho difisiénsia barak mak iha talentu, maibe laiha fasilidade ne’ebé mak adekuadu ba sira atu hala’o sira-nia atividade.

“Ema ho difisiénsia, iha Mantuto barak mak  hala’o sira nia atividade hanesan koa roda sai ba vazu ai-funan, kadeira, balde fase roupa,  maib’e  fasilidade  ba sira atu asesu laiha. Ami husu ba Sekretáriu Estadu atu haree ba ami nia preokupasaun hirak ne’e. Tanba juventude la’ós deit ema ne’ebé la ho difisiénsia, maibé ema ne’ebé ho difisiénsia mós iha direitu atu asesu ba fasilidade ne’ebé adekuadu,” nia rekomenda.

Responde kestaun ne’e, Sekretáriu Estadu Juventude no Desportu (SEJD), Abrão Saldanha, kompromete sei buka solusaun hodi rezolve preokupasaun hirak ne’ebé mak Juventude Manatuto  enfrenta.

“Imi nia prokupasaun, SEJD sei rozolve ho fazeadamente tanba kada tinan SEJD sempre aloka orsamentu ba juventude sira nia programa kona-ba kapasitasaun hodi tulun foinsa’e sira atubele adapta aan hodi bele buka moris iha Timor-Leste,’’ Sekretáriu Estadu ne’e afirma.

Governu liuhusi SEJD iha komitmentu atu tau matan nafatin ba Sentru Juventude iha territóriu Timor-Leste tomak inklui Juventude sira iha Manatuto.

Tanba, Sekretáriu Estadu ne’e dehan sentru formasaun juventude labele sai hanesan edifísiu administrasun públiku, maibé sentru tenke sai hanesan fatin ida hodi akumula juventude atu fó kapasitasaun no treinamentu oin-oin hanesan komputador, língua Inglés, Portugués no skill seluk hodi hasae abilidade juventude hodi adapta an ba neseside moris.

“Ita moris ona iha era globalizasaun tanba ne’e mundu agora, ladun fó importansia ba ema ne’ebé  iha nivél edukasaun ne’ebé aas, maibe mundu agora ne’e se mak hatene adapta-an lalais, nia mak sei moris. Tanba ne’e husu ba foinsa’e sira uja oportunidade ne’ebé di’ak hodi kapasita aan atubele adapta an ba realidade moris ne’ebé iha,’’ nia sujere.

SEJD mós esforsu an buka mós solusaun atu rezolve problema ema ho difisiénsia sira hodi fó asesivél ba ema ho difisiénsia.

“Ema ho difisiénsia la’ós atu hetan karidade husi governu, maibé ema ho difisiénsia presiza espasu no oportunidade ba sira atubele espresa sira nia talentu liuhusi atividade ne’ebé mak ema ho difisiensia halo,” nia akresenta.

Nune’e, Governu liuhusi SEJD sei servisu hamutuk ho Asosiasaun Difisiénsia Timor-Leste (ADTL) hodi rezolve preokupasaun ema defisiénsia sira iha Manatuto.

Iha oportunidade ida ne’e, Sekretáriu Estadu Juventude no Desportu (SEJD) kontinua vizita Grupu Virótika Kafé iha Suku Sau, Grupu Ganesa Kafé iha suku Aiteas, Manatuto ho objetivu fó motivasaun ba grupu foinsa’e sira  nian hodi kontinua  kapasita-an liuhosi treinamentu empredorizmu ne’ebé fasilita husi  Camara Comersiál Indústria Timor – Leste (CCI- TL) hodi bele serve ema ho di’ak liutan no enkoraja grupu foinsa’e sira hodi bele halo kreditu iha Ministériu Turizmu, Komérsiu no Indústria (MTCI) liuhosi asesu ba kreditu Suave ho juru 3% ba Micro pequena no media Empresa iha Timor – Leste.

Jornalista :Camilio de Sousa  

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here