Restu mortál ne'ebé rai iha uma-mahon, postu administrativu Uatulari. Imajen Tatoli/Vitorino Lopes da Costa

VIQUEQUE, 23 maiu 2022 (TATOLI)—Responsável sira sei haloot restu mortál iha tinan oin, ne’ebé daudaun rai hela iha uma-mahon iha postu Uatulari, munisípiu Viqueque.

“Restu mortál ne’ebé rai iha uma-mahon tenki hakoi ona tinan oin, tanba  foin lalais ha’u simu tékniku sira hosi Ministériu Asuntu Kombatete no Libertasaun Nasionál (MAKLN), mai eziji tenki hakoi ona,” Administradór postu Uatulari, Manuel do Rosário, informa ba Agência Tatoli, iha administrasaun munisípiu Viqueque, segunda ne’e.

Notísia relevante: Governu kontinua ona konstrusaun jardín eroi Luga-Asa Viqueque

Ba kestaun ne’e, Autoridade postu ne’e husu ba empreza responsável konstrusaun jardín eroi iha Luga-asa, suku Uma Uain Leten, postu administrativu Viqueque vila, hodi aselera prosesu konstrusaun, nune’e tama tinan 2023 bele entrega ona obra ba Governu.

Aleinde ne’e, Administradór postu sei konvoka reuniaun ho komisaun organizadora rekolla restu mortál.

“Nune’e, ita bele  tama faze dahaat rekolla restu mortál sira ne’ebé seidauk. Tanba ne’e, ha’u enkontru ho komisaun no família restu mortál sira hodi finaliza,” nia akresenta.

Nune’e, tinan 2023 sei tama programa fúnebre restu mortál, ne’ebé MAKLN sei prepara programa no plaka hodi distribui ba família saudozu sira, hafoin líder nasionál sira sei asiste hotu serimónia hafoin taka plaka ba saudozu sira-nia rate.

Konstrusaun jardín eroi responsável hosi empreza Natureza Fural, Lda, ho kustu obra hamutuk $200.00 resin.

Tuir dadus, restu mortál ne’ebé daudaun rai iha uma-mahon postu Uatulari hahú tinan 2013, ho totál 600.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here