Vise Prezidente Parlamentu Nasionál, Maria Angelina Lopes Sarmento. Imajen/Tatoli Egas Cristovao

DILI, 23 maiu 2022 (TATOLI)— Vise Prezidente Parlamentu Nasionál, Deputada Maria Angelina Sarmento Lopez, konsidera Konstituisaun Repúblika fó dalan ba Prezidente Repúblika, José Ramos Horta halo fiskalizasaun abstratu konstitusionalidade ba Orsamentu Retifikativu 2022, maski Prezidente Repúblika sesante promulga ona.

“Prezidente Repúblika atuál bele halo fiskalizasaun konstitusionalidade tanba   tranzisaun entre Prezidente Repúblika sesante ho Prezidente Repúblika foun polítika bele diferente hodi hakarak halo fiskalizasaun pur konstitusionalidade  ne’e direitu ninian,” Vise PN ne’e hateten ba Jornalista sira iha Parlamentu Nasionál, segunda ne’e.

Notísia Relevante: PN aprova proposta Orsamentu Retifikativu biliaun $1,2 iha finál globál

Konstitusaun Repúblika iha artigu 85 (kompeténsia Prezidente-Repúblika) ne’ebé iha aliña e) sita Husu Tribunál Supremu Justisa nian kona-ba apresiasaun preventiva no ba fiskalizasaun abstratu konstitusionalidade norma sira-nian, no mós haree inkonstitusionalidade tan omisaun.

Maski, nia dehan PR sesante Francisco Guterres Lú Olo promulga ona iha nia mandatu, maibé PR José Ramos Horta husu fiskalizasaun abstratu ne’e tuir norma legál.

“Se Prezidente Repúblika foun sente dehan ne’e ladun di’ak no nia hakarak husu fiskalizasaun abstratu nia direitu, maibé ita hein rona pronunsia hosi tribunál nian,” nia afirma.

Iha parte seluk, Deputada Bankada CNRT, Carmelita Moniz, dehan  bankada CNRT mós haree Orsamentu Retifikativu ne’e la tuir ona regra no enkuadramentu  lei orsamentu jerál nian.

“Agora ami hanoin katak orsamentu retifikativu mós ami hakarak halo fiskalizasaun abstratu, maibé se Prezidente Repúblika maka foti entaun tuir duni nia kompeténsia konstituisaun,” nia afirma.

Razaun fiskalizasaun abstratu, nia dehan tanba Governu foti liu Rendimentu Sustetavél Estimadu (RSE) ne’ebé la tuir Konstituisaun artigu 145 ne’ebé ko’alia katak tenke iha efisiénsia efikasia uza orsamentu Estadu.

“Ita iha OJE ne’e billiaun $2.1-resin foin gasta de’it 24%, agora governu husu tan billiaun $1.2,   ita dadaun ne’e iha  billiaun  $3.3,  se ita foti beibeik hanesan ita nian fundu minarai bele mohu,” hateten Carmelita Moniz.

Entretantu, Prezidente Repúblika, Francisco Guterres Lú Olo, , promulga  ona Dekretu Parlamentu Nasionál Lei númeru 62/V-alterasaun dahuluk ba Lei númeru 1/2022, 3 janeiru, kona-ba Orsamentu Jerál Estadu ba 2022 no kriasaun Fundu Kombatente Libertasaun Nasionál.

Orsamentu Jerál Estadu ba tinan-2022 aprovadu ho Lei númeru/2022, 3 janeiru, maibé haree ba situasaun ekonómika internasionál no aumentu substansiál tasa inflasaun nian, sai nesesáriu ba Estadu foti medida hamenus impaktu ekonómiku hodi antisipa liuhosi dotasaun orsamentál atu finansia sasukat sira.

Reseita konsolidada hosi Setór Públiku Administrativu hahú sa’e ba US $ 3,100, 688,695. Despeza orgaun servisu no Administrasaun Sentrál sa’e  ba $3,100,688,695.

Orsamentu Jerál Estadu Retifikativu ba tinan-2022 fahe tuir klasifikasaun ekonómika hanesan tuirmai ne’e $250.537.130 ba Saláriu no Vensimentu, $467.077.382 ba Bens e Servisu, $1.950.982.687 ba Transferénsia Públika, $41.914.097 ba Kapitál Menor no US $390.177.399 ba Kapitál Dezenvolvimentu.

Bazea ba lei ne’e, durante tinan 2022, Governu autorizadu bele foti transferénsia hosi Fundu Petrolíferu to’o montante $2,552.598.015.

Lei ne’e harii Fundu ba Kombatente Libertasaun Nasionál ho finalidade finansia programa apoiu ba Kombatente Libertasaun Nasionál iha área sosial, edukasaun, saúde, empregu, asesu ba kréditu no atividade ne’ebé manán rendimentu.

Lei Orsamentu Jerál Estadu Retifikativu ba tinan-2022 aprova iha Parlamentu Nasionál iha 11 maiu 2022 ho votu a-favór 36.

“Orsamentu Retifikativu atu serví no benefisia povu”

Primeiru-Ministru (PM), Taur Matan Ruak, kompromete katak sei halo esforsu hotu hodi ezekuta Orsamentu Retifikativu tinan 2022 ho montante biliaun $1,5 resin ho di’ak, hodi finansia medida sira.

“La’ós normál iha demokrasia, sira ne’ebé lakon kumpre promesa, normalmente iha demokrasia sé mak kumpre promesa mak sira ne’ebé manán iha eleisaun sira. Ami halo esforsu hodi implementa ho di’ak orsamentu ne’ebé aprova, orsamentu ne’e orsamentu ida atu serví povu no benefisia sidadaun sira,” PM Taur hateten hafoin debate no aprovasaun finál globál Orsamentu Retifikativu tinan 2022 iha sala plenária Parlamentu Nasionál, kuarta foin lalais ne’e.

Nune’e, Xefe Governu hateten: “Orsamentu ne’e ita orienta liu ba  populasaun sira, ho hanoin ida katak ema mak sai sentru ita-nia atensaun. Maibé liuliu iha fundu  veteranu, primeiru halakon eskluzaun no hahú era foun ida inkluzaun. Ha’u hanoin sira ne’ebé kontribui fulan-neen no hitu mós halo kontribuisaun, ita laiha razaun atu esklui sira hosi prosesu ida-ne’e, objetivu segundu maka ho kriasaun fundu ida-ne’e torna buat ne’ebé la sustentável ba sustentável tanba ita foti nia juru de’it, ita la fahe osan,” Xefe Ezekutivu esplika.

Aleinde ne’e, kona-ba fundu empréstimu suave, Governu foin dahuluk  tau atensaun no forma integrada ba setór produtivu hodi fasilita kréditu hodi dada atensaun setór privadu ba setór produtivu.

“Ne’e pasu importante loos no estratéjiku, tanba bele fó kbiit ba ita atu iha konfiansa iha ita-nia an no aproveita másimu rekursu sira ne’ebé iha hodi sustenta nasaun no bele valoriza produtu lokál, ne’e la hateten katak ita tenke despreza produtu seluk, maibé bainhira ita la valoriza sé mak valoriza fali,” nia tenik.

Orsamentu Retifikativu ne’e mai ho medida 13 hanesan Atribuisaun osan fulan da-13 ba kada família (exeptu funsionáriu públiku sira), Projetu Uma Kbiit Laek Plus, Bolsu Estudu ba Mellór Graduado Estudante, Kriasaun Fundu Veteranu, Programa Maundobra ba Postu Administrativu (PEMOPA), Harii Sede ba Arte Marsiál no Rituál, Programa Eskola iha uma (home school).

Nune’e mós, Oferese internet gratuitu ba eskola sira hahú hosi Eskola Infantil to’o Ensinu Superior, Buka Empregu ba mellór alunu universitáriu sira, Estabelesimentu Sekretária ba Asuntu Traballadór Esteriór no Komunidade Timoroan iha Diáspora, Revitaliza kafé no subsídiu ba kafé Laku-teen, Subsídiu akomodasaun ba Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) no ikus liu Pagamentu renumerasaun PNTL nian ho rejime salariál foun.

Notísia relevante:  PR Lú Olo promulga orsamentu retifikativu 2022

Jornalista : Natalino Costa

Editora     : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here