Diretóra Jerál MAP, Maria Odete do Ceu Guterres. Imajen Tatoli/Natalino Belo

DILI, 23 maiu 2022 (TATOLI)—Ministériu Agrikultura no Peska (MAP) iha vizaun ba longu prazu, ba tinan-10 tuir Planu Estratéjiku Dezenvolvimentu (PED) tinan 2011 to’o 2030, mak atu dezenvolve setór agríkola sustentável, kompetetivu no prósperu hodi hamenus kiak no kontribui hadi’a kondisaun moris povu no nasaun.

“Ita-nia misaun mak atu presta servisu efisiente ba komunidade ne’ebé prodús agríkola iha Timor-Leste, apoiu hadi’a produtividade hodi hetan rendimentu no esportasaun, atu nune’e kontribui hadi’a moris sosiál iha área rurál no tau iha konta mós kapitál umanu no rekursu finanseira hosi MAP,” Diretora Jerál MAP, Odete do Ceo, hateten ba Agência Tatoli, segunda ne’e.

Hosi Orsamentu Jerál Estadu (OJE) 2022 ho montante biliaun $1,6 (la inklui retifikativu), bazeia ba vizaun no misaun, Governu aloka orsamentu ba MAP hamutuk millaun $21,4, hodi tau importánsia boot ba setór produtivu hanesan agrikultura.

“Bainhira ita kompara ho tinan kotuk, alokasaun orsamentu mai setór agrikultura iha redusaun pur volta 27%, maibé iha mós apoiu hosi parseiru dezenvolvimentu sira,” nia akresenta.

Notísia relevante: MAP Viqueque sei kolleta produtu agríkola iha área Raitahu

Objetivu estratéjiku setór haat mak hanesan hakbiit governasaun di’ak no jestaun institusional, hasa’e sustentabilidade produsaun, produtividade no diversifikasaun ba produsaun agríkola, hakbiit asesu ba merkadu no valór akresentadu, inklui jestaun sustentável no prezervasaun ba rekursu naturál.

Aleinde ne’e, MAP hasoru dezafiu prinsipál durante implementasaun sistema akontabilidade, hanesan sistema akontabilidade ‘cash basis’, ne’ebé preparasaun orsamentu la envolve Diresaun Jerál Tesouru.

“Ezemplu estrutura orsamentasaun la kodiz ho sistema ezekusaun, liuliu liga ho kódigu item no line item, halo orsamentu Estadu sai tarde no la responde lalais ba nesesidade agrikultura ne’ebé tuir époka, klima, udan ben, no seluk tan,” nia informa.

Nune’e, orsamentu ba implementa planu atividade la’o iha forma pakote, tanba ne’e prejudika iha parte ezekusaun, produsaun no produtividade, ne’ebé seidauk adekuadu ho orsamentu Estadu ba setór agrikultura la adekuadu, tanba seidauk adekuadu iha planeamentu, koordenasaun, monitorizasaun no avaliasaun.

Dezafiu seluk mak falta dadus ne’ebé kredível hodi bele utiliza hodi atinje alvu hirak ne’ebé define ona iha PED, servisu estensaun seidauk forte, no maioria ofisiál tékniku, sei sentraliza iha MAP sentrál, mudansa klimátika, kustu produsaun boot liu tanba importasaun no taxa importasaun, ameasa ba produtu nasionál no área potensiál.

“Menus interese iha dezenvolvimentu agrikultura (migrasaun joven sira mai konsentra hotu iha Dili no bá rai-li’ur, no mós interese liu iha projetu infraestrutura hodi hetan osan lalais ba hadi’a sira-nia moris,” nia tenik.

Tanba importasaun no taxa importasaun, ameasa ba produtu nasionál no área potensiál menus interese iha dezenvolvimentu agrikultura, migrasaun joven sira mai konsentra hotu iha Dili no ba rai-li’ur, no mós interese liu iha projetu infraestrutura hodi hetan osan lalais ba hadi’a moris, seidauk iha interligasaun di’ak entre On-farm, 0ff-farm, kompetisaun iha merkadu, no kondisaun infraestrutura hanesan estrada iha área rurál difikulta asesu ba merkadu.

Hosi dezafiu sira-ne’e, vantajen ne’ebé MAP uza atu atinje vizaun mak rekoñesimentu importánsia agrikultura iha PED, kompromisu Governu hodi alkansa Objetivu Dezenvolvimentu Sustentável (ODS) ba ajenda 2030, adezaun ba Asosiasaun Nasaun Sudeste Aziátiku (ASEAN, sigla portuugés), ne’ebé bele loke oportunidade barak liután ba agrikultura.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here