Kolaboradór Rejiaun IV, Martino Amarál “Cova”. Imajen Tatoli /Celestina Teles.

COVALIMA, 23 maiu 2022 (TATOLI)—Kolaboradór Rejiaun IV Martino Amarál “Cova” triste tanba ema ne’ebé responsavel ne’ebé tuur iha estrutura iha partisipasaun luta ba libertasaun nasionál, maibé bainhira rejista ba veteranu ne’e sira-nia partisipasaun luta ho grau 4-7 de’it.

Notísia Relevante: Riak Leman monitoriza ekipa verifikasaun dadus kandidatu veteranu iha Covalima

“Triste uitoan. Ba ha’u, ema mak iha estrutura no lori ema bainhira rejista nia hetan de’it 4-7 maibé nia membru sira hetan grau 8-14. Pior liu, ema balun ne’ebé dala barak luta hodi hafuhu de’it didin ku’ak sira-ne’e hetan fali grau 8-14,” Martino Amarál “Cova” hato’o bainhira Prezidente Konsellu Kombatente Libertasaun Nasionál (CCLN, sigla portugés), Vidal de Jesus Riak Leman, halo monitorizaun ba verifikasaun dadus kandidatu veteranu, iha suku Matai, postu administrativu Maucatar, Munisípiu Covalima, segunda ne’e.

Tanba ne’e, nia dehan, ema ne’ebé mak reponsavél ho nia estrutura, iha momentu ema-ne’e halo rejista halo sira hetan fali grau 4-7, entaun ida-ne’e konfuzaun uitoan tanba FALINTIL sira mak mai, nune’e sira la hatene situasuan iha rai-laran.

Razaun, sira la hatene situasuan tanba ema sira-ne’ebé partisipa iha funu maibé tuur iha estrutura hanesan selkom ho nurep mak hetan fali grau 4-7, maibe triste tanba nia membru balun hetan grau 8-14. 

Ho nune’e, nia rekomenda ba Prezidente Konsellu Kombatente Libertasaun Nasionál (CCLN, sigla portugés), Vidal de Jesus Riak Leman, atu fó prioridade ba ema sira-ne’ebé iha estrutura ne’ebé hetan grau 4-7 atu revoga fali lei hodi hadi’a prosesu bele tau prioridade.

“Ha’u-nia rekomendasaun bele fó prioridade ba ema sira-ne’ebé mak tuur iha estrutura ne’ebé hetan de’it  grau 4-7 tenke hetan prioridade. Maske ho tempu, maibé bele revoga lei oinsá bele hadi’a no tuir prosesu atu nune’e responsavél no ema sira-ne’ebé iha estrutura bele hetan prioridade,” nia dehan.

Prezidente Konsellu Kombatente Libertasaun Nasionál (CCLN, sigla portugés), Vidal de Jesus Riak Leman, klarifika katak durante ne’e ba sira-ne’ebé mak simu ona pensaun veteranu grau 4-7, ida-ne’e defisil uitoan tanba lei la primite.

“Uluk ha’u mak responsavél ba sira na’in-lima (5), sira hetan ona grau 8-14, ha’u hetan grau 4-7 ne’e problema ida. Bainhira atu haree no halo reverifikasaun kazu pendente, ita sei haree tanba sira balun aprova grau 4-7, sira la simu ida-ne’e ita-sei haree,” nia dehan.

Ba asuntu ne’e, Riak Leman hateten, uluk ne’e eis Sekretáriu Estadu Marito Reis mak dehan bele simu ona aban bainhira mak simu tan, maibé lei la ko’alia hanesan ne’e,” nia hateten.

Nune’e, bainhira atu haree fali kazu pendente sei fó sai iha mídia, entaun hotu-hotu bele akompaña no tuur hamutuk sei haree hodi halo reverifikasaun sira-ne’ebé partisipasaun hetan fallansu ruma bele hadi’a sei loke rejistu foun hodi bele rejistu.

Tuir dadus, ekipa finaliza ona halo verfikasaun dadus kandidatu veteranu iha postu administrativu Fatumea, Fatululik, Fohorem, Tilomar no Zumalai hamutuk na’in-9,963 ne’ebé atinje ona 48% no postu administrativu seluk sei iha faze verifikasaun.

Jornalista : Celestina Teles

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here