Embaixadóra Timor-Leste ba Australia, Ines da Almeida. Imajen/Mídia G-PR

DILI, 23 maiu 2022 (TATOLI)—Embaixadora Timor-Leste iha Austrália, Inês Maria de Almeida, hateten fulan-jullu 2022 ne’e to’os-na’in hosi Tasmania, Austrália, sei halo rekrutamentu ba traballadór timor-oan hamutuk 300.

“Jullu mai-ne’e, to’os-na’in sira iha Tasmania halo prosesu rekrutamentu ba Timor oan 300 para partisipa iha servisu. Karik iha outubru bele ba Tasmania hodi partisipa iha servisu hanesan kuu morango,” Embaixadora Austrália ne’e hateten ba jornalista sira, iha salaun Ministériu Negósiu Estranjeiru no Kooperasaun (MNEK), Avenida Portugál (anteriór Praia dos Coqueiros), Dili, segunda ne’e.

Ida-ne’e mak progresu hanesan nu’udar xefe misaun, hamutuk ho xefe misaun seluk ne’ebé haruka mós sira-nia traballadór ba Austrália hodi halo servisu iha ne’ebá, tanba uluk visa ne’e ba fulan sia (9) entaun la to’o ba traballadór timor-oan atu rai osan uitoan ba sira-nia família maibé agora iha fleksibilidade aumenta ba tinan haat.

“Progresu ne’ebé atinje to’o agora, konsege halo duni. Agora programa Pasific Australia Level Mobility Skill, programa ida-ne’ebé fó visa fulan sia (9) depois iha mós dalan ba tinan haat maibé ne’e depende. Ita-nia traballadór nia komportamentu di’ak servisu di’ak, toos-na’in ka ajénsia sira gosta entaun fó visa sira tinan haat,” nia esplika.

Durante tinan haat, sira mós bele ba estuda iha área hortikultura, konstrusaun, nune’e bele hetan diploma para bainhira fila-fali mai Timor, sira iha ona diploma profisionál.

“Ida-ne’e progressu ne’ebé di’ak. Servisu ida-ne’e, la’ós mesak mak halo maibé servisu hamutuk ho Governu Austrália,” nia dehan.

Ministra Negósiu Estranjeiru no Kooperasaun (MNEK), Adaljiza Albertina Xavier Magno, hateten iha enkontru ho Embaixadora Austrália hodi ko’alia kona-ba kooperasaun iha asuntu ekonómiku.

“Tinan barak ita la halo reuniaun ho ita-nia Embaixadór sira, entaun ohin ne’e ita halo reuniaun kooperasaun ida ho embaixadór sira tanba liga ho pandemia COVID-19 ne’ebé ita iha problema ekonómia entaun ita bolu sira para mai atu oinsá ajusta programa, ajuda Governu hodi halo promosaun investimentu iha rai-li’ur,” nia dehan.

Liuhosi promosaun investimentu mak bele ajuda hodi halo rekuperasaun ekonómika no mós diversifikasaun ekonómika.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

3 KOMENTÁRIU

  1. IDA NEE BA SIRA NEBE AGORA KANDIDATO ONA / NARAN ANTES NE IHA ONA SISTEMA NEE OU ATU HALO PROSESU SELESAUN BA KANDIDATU TRABALHADOR FOUN ?

HAKEREK NO HATÁN

Please enter your comment!
Please enter your name here