Logotipu EDTL. Imajen/Espesiál

VIQUEQUE, 23 maiu 2022 (TATOLI)–Administradór postu Uatulari, Manuel do Rosário, husu komunidade koopera monta pré-pagu hosi Eletricidade de Timor Leste, Empreza Públika (EDTL, E.P) iha uma sira.

“Ha’u husu disponibilidade komunidade iha postu administrativu Uatulari atu koopera hamutuk ho EDTL, E.P sira hodi monta pré-pagu ba uma sira. Uluk ha’u rasik maka suspende monta pré-pagu iha Uatulari, maibé ida-ne’e programa Governu nian ita tenki simu,” Administradór postu informa ba Agência Tatoli, iha ninia knaar fatin, segunda ne’e.

Notísia relevante: EDTL, E.P Viqueque konsege monta prepagu 30 iha suku Macadique

Autoridade postu dehan, iha postu seluk iha Viqueque monta ona pré-pagu maibé komunidade iha postu Uatulari barak mak seidauk.

“Se ita lakoi simu pré-pagu, ema EDTL, E.P sira bele taka tiha eletrisidade ba ita, entaun Uatulari maka tur iha nakukun laran. Tanba ne’e, ha’u husu ba komunidade hotu disponível simu pre-pagu. Nune’e, ita bele poupa kombustível ba jeradór eletrisidade Hera no Betano,” nia akresenta.

Nia husu ba xefe suku, inan-aman, no veteranu sira, hodi kontribui ba Estadu, nune’e Estadu iha kbiit nafatin.

Iha fatin ketak, xefe suku Macadique, Afonso dos Reis, hateten, antes ne’e ekipa tékniku EDTL, E.P ba monta ona pré-pagu hamutuk 30 iha aldeia Liakaiua, suku Macadique, maibé ikus mai ekipa téknika sira retira hosi suku Macadique.

“Ha’u sempre aseita programa Governu, tanba ne’e ekipa EDTL, E.P sira ba monta pré-pagu hamutuk 30 iha suku Macadique, maibé iha uma ida maka rejeita atu monta, loloos ne’e EDTL, E.P maka foti desizasaun,” nia tenik.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here