Administradór munisípiu Viqueque, Januario Soares 'Bolly'. Imajen Tatoli/Vitorino Lopes da Costa

VIQUEQUE, 23 maiu 2022 (TATOLI)—Administrasaun Viqueque garante bainhira implementa  lei poder lokál no desentralizasaun administrativa, sei iha rekursu rua mak fó reseita ba munisípiu iha futuru.

“Aban bainrua bainhira ita implementa lei poder lokál no dezentralizasaun administrativa ba munisípiu sira.  Ha’u hanoin rekursu rua ne’ebé bele fó reseita ba munisípiu Viqueque maka rekursu agrikultura no mina-rai, ne’ebé maka ita iha. Rekursu seluk hanesan  fatuk, rai-henek no fatin turizmu sira. Tanba ne’e, ita presiza halo indentifikasaun ba turizmu hodi bele dezenvolve fatin turizmu ne’ebé eziste iha Viqueque,” Administradór munisípiu Viqueque, Januário Soares ‘Bolly’, hateten ba Agência Tatoli, iha Administrasaun munisipál, segunda ne’e.

Notísia relevante: Implementasaun podér lokál no desentralizasaun administrativa oportunidade ba emprezáriu lokál

Antes ne’e, eis Prezidente Repúblika, Francisco Guterres ‘Lú Olo’ promulga ona lei poder lokál no desentralizasaun administrativa, ne’ebé fó kompeténsia ba munisípiu sira jere administrativamente iha futuru.

Iha turizmu relijiuzu, rezisténsia, kulturál no eko-turizmu mak bele dezenvolve hodi sai fonte reseita ba munisípiu Viqueque.

“Ita presiza halo dezenvolvimentu turizmu, nune’e iha futuru bele fó reseita ba munisípiu hodi  utiliza ba dezenvolve di’ak liután iha ita-nia munisípiu,” nia aresenta.

Foin lalais munisípiu Viqueque inaugura ona sentru komunitáriu iha bee-luli manas, maibé dezenvolvimentu boot liu mai munisípiu rasik seidauk iha.  Liuhosi setór agrikultura, peska no turizmu sira mak bele fó reseita ba Estadu.

Tuir Administradór, liga ba rekursu umanu ba implementasaun dezentralizasaun administrativa, iha munisípiu Viqueque daudaun ne’e sei menus tanba barak hela iha Dili.

“Ita espera iha futuru implementasaun lei poder lokál, sira akompaña oferese sira-an mai serbisu iha munisípiu Viqueque atu kompleta rekursu sira ne’ebé iha ona munisípiu. Rekursu liña ministeriál sira hotu serbisu la’o hela iha munisípiu Viqueque iha, maibé ita bele nota katak sei iha difikuldade. Tanba ne’e, tenki esforsu-an no ita mós prepara-an bainhira hetan fiar hosi Governu sentrál mak tenke entrega kompeténsia mai munisípiu hodi bele hala’o knaar,” nia tenik.

Tuir dadus, funsionáriu administrasaun munisípiu Viqueque permanente iha 49 no kontratadu 94.

“Govenru sentrál seidauk atribui poder tomak ba munisípiu hotu. Ha’u rona munisípiu rua maka sei simu poder lokál iha tinan 2023 ka 2024. Kona-ba preparasaun simu lei poder lokál no dezentralizasaun administrativa ami prepara hela, bainhira loos maka Governu sentrál entrega poder ba ami. Baibain ha’u husu diretór munisipál sira tenki esforsu-an hodi aprende,” nia enkoraja.

Alende ne’e, Governu sentrál no Parlamentu Nasionál seidauk aprova lei finansa, maibé agora daudaun sei aplika hela lei númeru 3/2016 hodi fó kompeténsia balun dezentraliza ba munisípiu sira.

“Kestaun ne’e kompete hosi ministériu sira hodi dezentraliza kompeténsia ba munisípiu, maibé sira sei kontinua akompaña nafatin to’o momentu ida entrega ona ba munisípiu, entaun ministériu sira halo monitorizasaun. Ha’u hanoin futuru  implementa dezentralizasun sei la dook hosi lei nú 3/2016 nian,” Autoridade ne’e dehan.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here