Diretór Servisu Nasionál Ambulánsia no Emerjénsia Médika (SNAEM),I.P, Horacio Sarmento da Costa. Imajen Tatoli/Francisco Sony

DILI, 23 maiu 2022 (TATOLI)— Diretór Jerál Servisu Nasionál Ambulánsia Emerjénsia Médika Insitutu Públiku (SNAEM,I.P), Horacio Sarmento, informa iha ona planu  atu sosa karreta ambulánsia unidade 12 hodi distribui ba munisípiu sira atu fasilita pasiente sira asesu ba saúde.

“Ami identifika problema  iha munisípiu sira tanba munisípiu balun sei  uza karreta ambulánsia tuan  ne’ebé uza besik tinan 10 ona , nune’e patrimóniu Estadu  atu lelaun karreta  ami propoin orsamentu foun para atu hola ambulánsia foun 12 hodi  apoiu ba   munisípiu,” Diretór Jerál Horacio Sarmento  hateten ba iha nia kna’ar fatin Caicoli,segunda ne’e.

Iha tinan ne’e, SNAEM, I.P la konsege sosa karreta ambulánsia   tanba orsamentu laiha no la konsege halo manutesaun ba karreta ambulánsia hamutuk 34 iha teritóriu  nasionál.

“Ita haree iha munisípiu Aileu, Same, Ermera Maliana, Liquiça, Covalima, Lautem, Ainaro, Baucau hasoru problema ambulánsia, nune’e ita esforsu no hakarak kada munisípiu tenke iha abulánsia rua hodi atende kazu sira ho di’ak,” nia afirma.

Daudaun ne’e, nia dehan Aviaun Mission Aviation Fellowship (MAF) nafatin hala’o operasaun normál hodi  tula  pasiente husi munisipiu mai iha Hospitál Nasionál Guido Valadares (HNGV) hodi hetan tratamentu médiku.

“Aviaun Mission Aviation Fellowship (MAF) kondisaun di’ak hela no halo operasaun normál  tanba iha aviaun rua  troka malu hodi tula pasiente  sira husi munisípiu mai HNGV,” nia informa.

Durante ne’e, aviaun sira  ne’e hala’o operasaun loron de’it hahú tuku 07:00 dader too  tuku 5:00 lokoraik, liu ida ne’e aviaun labele halo operasaun tanba kondisaun aeroportu  tantu iha Dili  no munisípiu laiha pista ne’ebé di’ak.

Orsamentu ne’ebé alokadu ba Servisu  Nasionál Ambulánsia Emerjénsia Medika  hamutuk  rihun $190 atu selu deit kustu transferensia  husi munisípiu hitu hanesan Baucau, Viqueque, Lautem Covalima, Oé-cusse , Same  Maliana  no Atauro.

Jornalista : Felicidade Ximenes

Editór     : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here