Jenerál Reformadu, Tito da Costa Cristóvão ‘Lere Anan Timur. Imajen Tatoli/Tomé Amado.

DILI, 20 maiu 2022 (TATOLI)—Iha komemorasaun aniversáriu ezisténsia ASDTT/FRETILIN ba dala-48 ne’ebé hala’o iha sede Comite Central FRETILIN (CCF) ne’e, estrutura partidu FRETILIN simu fila-fali Francisco Guterres ‘Lú-Olo’ iha vida polítika partidaria hodi asume hikas ninia knar nu’udár Prezidente Partidu FRETILIN.

Biban ne’e, FRETILIN mós fó sertifikadu rekuñesimentu no entrega kartaun membru partidu sai membru CCF ba Tenente Jenerál Reformadu, Lere Anan Timur nu’udár membru segunda jerasaun Comite Central FRETILIN (CCF).

Sekretáriu Jerál FRETILIN, Mari Alkatiri hateten, loloos rekuñese Lere Anan Timur hala’o tiha ona iha tinan 2015, maibé tanba nia sei jenerál ne’e mak la konsege.

“Ha’u kontente tanba ohin bele simu fila-fali kamarada Lú Olo. Kontente liután tanba bele simu fila-fali kamarada Lere Anan Timur iha uma lulik ida-ne’e, uma lulik ne’ebé reprezenta, rasn ho ruin, isin sira-ne’ebé mak naklekar iha Timor laran tomak,” Mari Alkatiri hateten iha CCF, Comoro, sesta ne’e.

Allatiri hateten, loron ohin ne’e importante tebes ba FRETILIN nia vida tanba hahú hosi ne’e ba oin, partidu FRETILIN hamriik metin liután.

“Biar hanesan Jenerál, kamarada Lere Anan Timur (LAT) nunka nega katak nia FRETILIN. Tanba ne’e, nia mai iha ninia uma rasik. Lolos rekuñesimentu ida-ne’e halo ona iha tinan 2015, maibé tanba nia sei jenerál ami rai tiha dokumentu sira-ne’e. Hosi ne’e ba oin, ita sei hetan kontribuisaun importante ba hametin liután FRETILIN, kontribuisaun nia naran mak Lere Anan Timur,” Alkatiri hateten.

Prezidente Partidu FRETILIN, Francisco Guterres ‘Lú-Olo’ hateten, nia fila-fali mai iha mundu polítika sai Prezidente Prtidu FRETILIN hamutuk atu hametin partidu.

“Tinan lima liubá ha’u sai husi uma ida-ne’e (CCF) ba kumpre misaun boot ida. Ohin, ha’u fila-fali mai uma lulik ida-ne’e. Ha’u mai fali, ita hotu hamutuk atu hametin liután FRETILIN,” Lú Olo dehan.

Lú Olo agradese ba apoiu hotu ne’ebé mak FRETILIN nia lideransa, militante no simpatizante sira no povu tomak fó ba nia durante ninia mandatu hanesan Prezidente Repúblika.

Enkuantu, hafoin simu tiha sertifikadu rekuñesimentu no kartaun membru nian, Lere Anan Timur hateten, ida-ne’e hanesan onra boot tebes tanba fila-fali mai hamutuk ho FRETILIN.

“Ho onra boot tebes, ha’u bele fila-fali mai hamutuk ho kamarada sira hotu, halibur hamutuk iha uma lulik ida-ne’e, sede Comite Central FRETILIN. Uma lulik ida-ne’e la’ós foun, hosi vila muda ba foho, hosi foho muda fali mai vila tanba FRETILIN la kotu, nunka kotu, nunka lakon iha dalan klaran biar iha situasaun defisil nia laran,” nia hateten.

Lere hateten, nia moris nanis kedas ho uma lulik CCF tanba uma lulik ida-ne’e hosi vila ba ai-laran, hosi ai-laran fila-fali mai vila-laran.

Tenente Jenerál Reformadu ne’e hatutan, nia mai atu serbi FRETILIN no sei serbisu hamutuk ho lideransa, kuadru, militante sira no ema hotu atu halo FRETILIN hamrik metin, haforsa no lori FRETILIN ba vitória.

“Ha’u mai atu serbi partidu, atu serbi Estadu. Ha’u mai la’ós atu sai opozisaun ba kualker kamarada ka líder ida,” Lere promete.

Biban ne’e, partidu FRETILIN halo mós lansamentu ba portál partidu FRETILIN nian; https://fretilin.tl/.

Jornalista : Antónia Gusmão

Editór       : Cancio Ximenes   

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here