Ministru Prezidénsia Konsellu Ministru, Fidélis Manuel Leite Magalhães, hasoru malu ho Ministra Prezidénsia Konsellu Ministru no Asuntu Parlamentár, Filomena Mendes Gonçalves, hosi Cabo Verde. Imajen/Espesiál.

DILI, 20 maiu 2022 (TATOLI)—Ministru Prezidénsia Konsellu Ministru, Fidélis Manuel Leite Magalhães, sesta ne’e, hasoru malu ho Ministra Prezidénsia Konsellu Ministru no Asuntu Parlamentár, Filomena Mendes Gonçalves, hosi Cabo Verde iha Palásiu Governu, Dili.

“Ha’u iha previléjiu pesoál hasoru malu ho Exelénsia Ministra Prezidénsia Konsellu Ministru Asuntu Parlamentár hosi ita nia país irmãs Cabo Verde ne’ebé vizita Timor-Leste iha ámbitu selebrasaun tinan 20 restaurasaun independénsia,” Fidélis Manuel Leite Magalhães hateten liuhosi nota komunikadu ne’ebé Agência Tatoli asesu, sábadu ne’e.

Nia dehan, hosi vizita ne’e Filomena Mendes Gonçalves nu’udar reprezentasaun Cabo Verdianu nian no nia ministra funsiona hanesan ema hotu hatene oinsá tenke iha papél ne’ebé mak importante, fundamentál ba funsionamentu atividade normativa Governu atuál, Governu Cabo Verdianu nian.

Nune’e mós, inklui área oioin ne’ebé iha posibilidade atu esplora, posibilidade kooperasaun ne’ebé di’ak liután iha futuru iha área modernizasaun adminitrativa, reforma Estadu, no aleinde ida-ne’e mós iha melloramentu prosesu lisensiamentu sira no prosesu melloramentu kualidade instituisionál nian.

“Entaun hafoin ha’u ko’alia ho Exelénsia ministra, konkorda katak sei simu konvite hosi senhora Ministra atu bele iha posilidade iha tempu badak bele ba, iha previléjiu ida ba vizita Cabo Verde hodi haree ho matan rasik, kondisaun Cabo Verde, nomós haree rasik iha Cabo Verdo kona-ba esforsu hotu ne’ebé mak sira halo ona,” nia dehan.

Jornalista : Arminda Fonseca

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here