Prezidente Komisaun Nasionál Juventude katólika Timor-Leste Padre, João Soares. Imajen Tatoli/Francisco Sony

DILI, 21 maiu 2022 (TATOLI)—Konsellu Nasionál Juventude Katólika (CNJCTL, sigla portugés), sábadu ne’e, kongratula ba Prezidente Repúblika períodu 2022-2027, José Manuel Ramos Horta, ne’ebé simu ona pose sai nudar PR atu propoin ba Governu hodi fó prioridade ba área edukasaun.

Notísia Relevante: CNJCTL lansa atividade Jornada Mundiál Juventude

“Iha momentu ida-ne’e ha’u hakarak lori CNJCTL nia naran hakarak hato’o ami-nia kongratulasaun ka felisitasaun ba Prezidente Repúblika José Manuel Ramos-Horta, espera katak ho ita-boot nia ukun nu’udar PR, bele propoin ba Governu atu fó mós prioridade liu ba sistema edukasaun tanba edukasaun importante sai fuan ba nasaun Timor-Leste,” Prezdente CNJCTL, João Soares, hateten, iha salaun Katedral, Dili.

Tuir nia, Governu tau importánsia iha sistema edukasaun ne’e hahú hosi baze to’o ensinu superiór sira, tanba nasaun ida atu la’o ba oin ne’e presiza edukasaun ne’ebé di’ak no fó atensaun mós ba foinsa’e sira.

“Espera ho PR foun ne’e bele hala’o nia knar ho di’ak no tau atensaun mós ba foinsa’e sira tanba maiória ita-nia nasaun ne’e foinsa’e sira barak liu. Sai PR ne’ebé hadomi povu liu-liu ba povu ne’ebé mukit, sai PR tau matan ba joven sira liu-liu joven ne’ebé vulneravél sira,” nia hateten.

Tanba, nia dehan, Timor-Leste ne’e povu ne’ebé simples nune’e tulun povu bele halo kompleta liután nesesidade ne’ebé sei presiza atu hadi’a.

Aleinde ne’e, nia mós husu ba PR foun ba oin tau importánsia mós ba Konsellu Nasionál Juventude Katólika (CNJCTL, sigla portugés) ne’ebé mak sei koopera ho PR foun hodi tau matan ba foinsa’e sira.

Iha biban ne’e, nia parte mós hato’o Agradese ba PR sesante Francisco Gutteres Lú Olo ho nia espoza ne’ebé duante ne’e tau matan makaas ba Konsellu Nasionál Juventude Katólika (CNJCTL, sigla portugés) to’o hakotu ninia mandatu.

“Ha’u lori CNJCTL hakarak agradese ba Prezidente Repúblika sesante Francisco Guterres Lú Olo ho nia espoza Cidália Mouzinho Nobre Guterres, ne’ebé dezde CNJCTL hamriik ami servisu hamutuk tulun liuhosi osan no korajen sira-ne’ebé ami hamutuk eduka joven sira oinsá sira haree ba igreja no mantein sira-nia an ho di’ak. Ida-ne’e ami rekuñese hato’o agradese barak,” nia dehan.

Jornalista : Arminda Fonseca

Editór       : Cancio Ximenes

PUBLISIDADE HUSI MTCIiklan

1 KOMENTÁRIU

  1. Notísia ne’ebé konfortável atu lee tanba hakerek ho linguazen ne’ebé klaru no fasil atu kumpriende. Agradese wain.🙏

HAKEREK NO HATÁN

Please enter your comment!
Please enter your name here