Vise Ministru Finansa, António Freitas. Imajen Tatoli/Natalino Belo.

BAUCAU, 20 maiu 2022 (TATOLI) – Vise Ministru Finansa, António Freitas, fó-sai katak tempu to’o ona Governu tenke investe maka’as iha setór produtivu hanesan agrikultura no turizmu nune’e hasa’e rendimentu estadu nian.

Vise Ministru Finansa, António Freitas hateten liuhosi selebrasaun loron istóriku ne’e iha esperansa katak ekonomia Timor-Leste iha tinan-lima mai liuhosi fundu petrolíferu presiza investe iha área produtuvu hanesan turismu no agrikultura nune’e bele hasa’e ekonomia nasaun no rendimentu povu nian.

“Ha’u fiar ho lideransa Prezidente Repúblika José Ramos Horta ne’ebé iha esperiénsia, liuliu iha diplomasia bele enkoraja parseiru dezenvolvimentu sira ajuda ita-nia dezenvolvimentu iha rai Timor-Leste,” Vise Ministru Finansa hateten iha administrasaun munisipál, Vila Nova, Baucau, sesta ne’e.

Membru governu ne’e akresenta, liuhosi orsamentu retifikativu aloka orsamentu iha setór produtivu hanesan agrikultura liuliu plantasaun kafé tanba kontribui ba reseita doméstiku ne’ebé kada tinan Timor-Leste hetan millaun $20.

Prezensa Vise Ministru António Freitas reprezenta VIII Governu Konstitusionál atu hato’o mensajem estadu hosi Prezidente Repúblika iha ámnbitu selebrasaun loron restaurasaun independénsia 20 maiu ba dala-XX iha Baucau.

Mensajen Prezidente Repúblika José Ramos Horta konsentra liu pontu liman inportante hanesan agradesimentu ba parseiru dezenvolvementu ne’ebé durante ne’e halo kooperasaun ho estadu Timor-Leste hahú iha tempu reziténsia to’o ohin loron, hato’o kompromisiu durante mandatu tinan-lima mai hanesan dezenvolvimentu ba setór juventude.

Mesajen seluk mak atu promove diálogu ho líder nasionál no partidu polítiku no ikus mak Prezidente repúblika promete atu reativa hikas programa sira-ne’ebé halao iha anteriór bainhira asume pasta xefe estadu hanesan atividade desportu no turismu.

Serimónia hasa’e bandeira iha resintu administrasaun munisipál Baucau prezide hosi Vise Ministru Finansa, António Freitas nu’udar inspetór no partisipa hosi veteranu, autoridade munisípiu tantu sivíl no militar, konviksaun relijioza no komunidade Baucau.

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here