Prezidente Repúblika Portugal, Marcelo Rebelo de Sousa, halo vizita ba Antigu Misionáriu portugés iha Timor-Leste, Padre João Felgueiras, iha Eskola Amigo de Jesus, Lahane Orientál, sesta (20/05). Imajen/Espesiál

DILI, 20 maiu 2022 (TATOLI)—Prezidente Repúblika (PR) Portugal, Marcelo Rebelo de Sousa, kondekora grau crus Ordem de Camões ba Antigu Misionáriu portugés iha Timor-Leste, Padre João Felgueiras.

Atribuisaun ne’e durante vizita PR Marcelo ba Eskola Amigo de Jesus, ne’ebé akompaña mós hosi Ministru Edukasaun Juventude no Desportu (MEJD), Armindo Maia.

“Nia fó duni nia-an mai iha rai Timór nu’udar misionáriu ida, maibé nia nafatin nu’udar ema portugés. Tanba ne’e maka Xefe Estadu Portugal uza oportunidade mai vizita eskola ne’e hodi fó mós kondekorasaun ba nia,” Ministru hateten iha Eskola Amigo de Jesus, Lahane Orientál, sesta ne’e.

Notísia relevante: PR Horta konvida labarik sira kumprimenta PR Portugál Marcelo Rebelo

PR Portugal atribui kondekorasaun ba Amu João tanba atu valoriza nia nu’udar misionáriu portugés ne’ebé dedika-an tomak ba Timor-Leste no tinan ne’e ho idade 101, nia sei nafatin kumpre devér no obrigasaun hodi dedika nia vida tomak nu’udar misionáriu ida.

Ordem de Camões hanesan orden onorífika portugés, ne’ebé kria hosi Asembleia Repúblika iha loron 07 juñu 1985, maibé só integra iha kuadru orden onorífika iha loron 30 juñu 2021 no atribui to’o agora.

Kondekorasaun ne’e destina ba hirak ne’ebé destingi servisu relevante hodi salvaguarda no projesaun  lian portugueza, hanesan entidade ne’ebé espresa-an ho lian portugueza iha mundu.

Aleinde ne’e, iha loron 19 maiu, Prezidente Marcelo halo ona ninia vizita ba Eskola Portugés Dili (EPD) Rui Chinaty no eskola referénsia lian portugueza, Centros de Aprendizagem e Formação Escolar (CAFE) iha Dili tanba eskola rua ne’e iha relasaun partikulár ho Estadu Portugal.

“Eskola rua ne’e iha ninia partikularidade, tanba EPD Rui Chinaty iha relasaun ho Governu Portugal no durante ne’e sira maka finansia buat hotu inklui kurríkulu sira la’o tuir padraun Portugal, Governu Timor-Leste fó de’it apoiu polítika, enkuantu CAFE hosi Estadu Timor-Leste nian, maibé Prezidente Marcelo hakarak halo vizita mai CAFE tanba iha relasaun ho rekursu umanu,” Ministru haktuir.

Governu Timor-Leste halo ona kooperasaun ho Portugal liuhosi Instituto de Camões hodi haruka profesór lubuk ida hosi Portugal mai Timor-Leste, atu apoiu profesór timor-oan sira hodi hanorin iha eskola CAFE.

“Ita kria planu vizita ida-ne’e atu Prezidente Marcelo bele halo vizita hodi haree rezultadu kooperasaun entre país rua iha área edukasaun, liu-liu iha prosesu ensinu aprendizajen iha eskola ne’e rasik,” nia tenik.

Tuir Ministru, Prezidente Marcelo kontente tebes ho rezultadu kooperasaun no hakarak kooperasaun di’ak ne’e kontinua nafatin.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here