Komunidade suku Holsa, postu administrativu Maliana, Casimiro Perreira Gomes. Imajen Tatoli/sérgio da Cruz.

BOBONARO, 20 maiu 2022 (TATOLI) – Povu iha munisípiu Bobonaro husu Prezidente Repúblika (PR), José Manuel Ramos Horta, durante mandatu tenke marka ajenda kada fulan halo vizita ba iha baze hodi haree direitamente hodi identifika preokupasaun komunidade nian.

Komunidade suku Holsa, Casimiro Perreira Gomes, rekomenda ba Prezidente Repúblika atu implementa planu prioridade ne’ebé fó sai ona iha diskursu ba aniversáriu komemorasaun 20 maiu nune’e bele lori povu sai hosi kiak no mukit.

“Ha’u husu ba na’i-ulun sira agora mosu mai ne’e, labele tuur iha fatin de’it mak hato’o programa, maibé tenke tún direitamente iha povu nia leet, atubele haree ho matan saida mak povu halerik, sé ema de’it mak informa ba leten, bele mós justu, bele mós la justu,” nia informa ko’alia iha kampu futeból Maliana, sesta ne’e.

Tuir nia, xefe estadu foun tenke serbisu hamutuk ho governu tau prioridade ba dezevolvimentu setor agrikultura nune’e bele fó oportunidade povu agrikultór hakbiit sira-nia vontade hodi hasa’e produsaun agríkola iha rai-laran.

Casimiro akresenta, durante ne’e agrikultór sira badinas halo espansaun ba produtu argíkola sira, maibé dala-barak governu la tau importánsia sosa produtu hirak-ne’e hodi distribui ba merkadu sira iha nasionál no promove ba merkadu internasionál.

“Ami agrikultór ne’e badinas ona, maibé governu presiza apoiu tratór atu nune’e ita bele hasa’e kuantidade produsaun, tanba durante ne’e apoiu menus depois laiha merkadu, entaun ami agrikultór sira baruk halo natar no to’o ikus mai ita nafatin dependénsia ba produtu importansaun,” nia dehan.

Nune’e mós komunidade Maliana, Simplicio da Cruz, reforsa iha duni nesesidade uku-nain sira hadi’a infrastrutura bázika sira hanesan, estrada, bee-moos no eletrisidade, tanba durante tinan 20 ona problema hirak-ne’e kontinua sai preokupasaun povu nian iha área remota.

Komunidade suku Lahomea, postu administrativu Maliana, munisípiu Bobonaro, Simplicio da Cruz. Imajen Tatoli/Sérgio da Cruz.

“Buat hotu durante ne’e diak, ita labele dehan di’ak ka aat hotu de’it, maibé ami husu presiza hadi’ak liután atu ami bele hadi’a ami-nia moris, sé governu ho estadu fó mai ami, hanesan povu ami simu, sé la fó ba mós kuitadu ami mak hanesan nune’e de’it ona,” nia hateten.

Hatán ba prekupasaun ne’e, Vise Ministru Agrikultura no Peska, Abílio Xavier Araújo, hateten durante mandatu tinan lima xefe estadu foun iha planu tau importánsia área prioridade lima hanesan edukasaun, nutrisaun no interligadu ho área sira seluk iha fronteira, munisípiu Bobonaro, Covalima no RAEOA.

Vise Ministru Agrikultura no Peska, Abílio Xavier de Araújo. Imajen Tatoli/Sérgio da Cruz.

Tanba ne’e polítika VIII governu nian sei kontinua sekunda prioridade hirak-ne’ebé xefe estadu trasa, tanba haree katak serbisu hirak-ne’e ba interese nasionál.

“Entaun presiza ita hotu-hotu nia sentidu pertense ba iha ideia no konseitu ne’ebé ita-nia Prezidente Repúblika hasai ne’e,” nia hateten.

Kona-ba dezenvolvimentu iha setór agrikultura, ezekutivu ne’e fundamenta, foin lalais iha debate orsamentu retifikativu prevee millaun $6,4 hodi bele sekunda nesesidade povu iha futuru.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here