Prezidente Repúlika períodu 2022-2027, José Ramos Horta no Prezidente Repúblika Portugal, Marcelo Rebelo de Sousa partisipa Sesaun Solene Paralamentu Nasionál, sesta (20/05). Imajen Tatoli/Francisco Sony.

DILI, 20 maiu 2022 (TATOLI)—Parlamentu Nasionál (PN), sesta ne’e, liuhosi sesaun solene komemora tinan 20 ba ezisténsia Konstituisaun Repúblika Demokrátika Timor-Leste (RDTL) iha nia entrada vigór.

Notísia Relevante: PR Lú Olo husu PN identifika lakuna iha konstituisaun halo revizaun

“Ha’u deklara sesaun solene ba komemorasaun tinan 20 Konstituisaun Repúblika Demokrátika Timor-Leste no parabeniza povu tomak,” Prezidente Parlamentu Nasionál, Aniceto Longuinhos Guterres Lopes, deklara iha sala plenária Parlamentu Nasionál.

Restaurasaun independénsia 20 maiu 2002, momentu ne’e konstituisaun tama iha vigór no realizasaun sesaun inaugurasaun primeiru Parlamentu Nasionál ho Estadu ne’ebé independente no demokrátiku, no luta ba libertasaun durante tinan 24 ho esperansa liña futuru konjuga esforsu hotu ba progresu dezenvolvimentu nasaun.

Konstituisaun Repúblika Demokrátika Timor-Leste, obra magna Asembleia Konstituiente no manifesta dedikasaun pilár fundamentu Estadu direitu demokrátiku.

“Konstituisaun koroláriu ita-nia indepedénsia, manifesta kompromisu forte iha edifikasaun ordenamentu polítiku, jurídiku no instituisionál aliserse iha prinsípiu Estadu direitu demokrátiku no diginidade umana. No, konsagra valór fundamentál hosi timor-oan iha luta ba libertasaun tinan 24 hodi sosiedade justa, pasífika, prósperu, solidáriu no fraternal,” nia hateten.

Tuir nia, evolusaun polítika, sosiál no ekonomia iha tinan 20 ejize arbitrar diferensa maibé mantein sempre hanesan matrix referensiál prinsípiu fundamentál primadu konstituisaun no lei konduta Estadu.

“Ita hatene tinan 20 ho dezafiu oioin iha prosesu dalan konstrusaun Estadu hodi aprende ho difikuldade no dúvida maibé rezilénsia tebes ho espíritu sakrifísiu luta ba nasaun ida indepedente,” Aniceto Guterres dehan.

Prezidente Parlamentu Nasionál ne’e hateten, konstituisaun la’ós ho vista apenas iha domíniu teóriku normativu, bele mós konstitui guia ida ba rezolusaun dezafiu boot iha área polítiku, sosiál, ekonomia no konsolidasaun instituisaun demokrátika no dezenvolvimentu nasionál ho mós dezafiu globál diariamente hasoru ne’ebé ejize kriasaun solusaun adekuadu no promotor koezaun sosiál ne’ebé forsa iha kuadru lei fundamentál, nune’e demokrásia no dezenvolvimentu konstrui hosi loron ba loron.

Iha loron tolu liubá Parlamentu Nasionál realiza semináriu iha okaziaun tinan 20 ezisténsia konstituisaun ho objetivu debate prinsípiu regula no sistema ne’ebé konklui katak konstituisaun bele mantein hanesan forsa sintese polítika ekilibradu podér Estadu.

“Debate konstituisaun iha sosiedade timor-oan revela ho forma salutar hanesan ita hatene konstrui ita-nia demokrásia no kompromisu forte ba Timorense ho sistema demokrátiku,” nia hateten.

Kompromisu timor-oan nian ho demokrásia reprezenta mós kompromisu ho prinsípiu no valór fundamentál, karatér universál no esénsia ba umanidade.

Ho sentidu ne’e, Parlamentu Nasionál iha loron hirak liubá mós aprova ona rezolusaun kona-ba Pás Mundiál, Fraternidade Umana no Koesisténsia Komun, konsidera dokumentu kona-ba Fraternidade Umana pás mundiál ne’ebé promove hosi Santidade Papa Francico no Grande Imã de Al-Azhar, Ahmad Al Tayyeb, iha Abu Dabhi, fevereiru 2019.

Iha fatin hanesan, Prezidente Repúblika Portugál, Marcelo Rebelo de Sousa, louva Timor-Leste durante tinan 20 nu’udar Estadu soberanu ne’ebé sempre promove ba pás universál ho respeitu diferensa ideia no relijiaun.

“Liafuan ne’ebé Papa Francisco hato’o ba Timor-Leste, mundu aprende ho povu Timorense ne’ebé ho vontade koletiva nasaun espresaun polítika iha kuadru respeitu direitu internasionál no regra konviviensia pasífika, no mundu aprende ho povu Timor-Leste iha pajina istória ho ideal pás, diálogu, fraternidade, solidariedade, koezaun no kompromisu,” nia dehan.

Entertantu, serimónia sesaun komemorasaun tinan 20 konstituisaun ne’e partisipa hosi Prezidente Repúblika José Ramos Horta, Primeiru-Ministru Taur Matan Ruak, Prezidente Tribunál Rekursu Deolindo dos Santos, Prezidente Repúblika Portugál, Marcelo Rebelo de Sousa, enviadu espesiál, embaixadór, korpu diplomátiku hosi nasaun amigu no sira seluk.

Notísia Relevante: Polítiku-na’in presiza refleta konstituisaun define objetivu Estadu lori povu moris di’ak

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here