Sekretáriu Jerál CMCLN Baucau, Manuel Alari da Costa Soares. Imajen Tatoli/Natalino Belo.

BAUCAU, 20 maiu 2022 (TATOLI) – Konsellu Munisipál Kombatente Libertasaun Nasionál (CMCLN, sigla Portugés), Baucau iha ámbitu selebrasaun loron restaurasaun independénsia ba dala-XX, husu ba Prezidente Repúblika José Ramos Horta atu promove diálogu ho líder nasionál no partidu polítiku sira hodi hakotu inserteza polítika ne’ebé la’o tempu naruk.

Sekretáriu Jerál CMCLN, Manuel ‘Alari’ da Costa Soares, hato’o parabéns ba povu Timor-Leste no parabéns ba Prezidente Repúblika José Ramos Horta ne’ebé hetan ona pose nu’udar xefe estadu nune’e husu atu kria diálogu entre entre líder nasionál no entidade hotu atu rezolve problema no lori dezenvolvimentu ba povu.

“Sira hamutuk iha tempu rezisténsia, agora sira tenke hamutuk atu rezolve problema hodi lori povu ba oin,” Alari hateten iha resintu administrasaun munisipál, Vila Nova Baucau, sesta  ne’e.

Maske situasaun polítiku entre líder nasionál sira iha palku durante kampaña atake malu maibé nunka hanoin atu estraga rai Timor-Leste nune’e ho selebrasaun loron restaurasaun ba dala-XX, Timor-Leste tenke la’o ba oin liuhosi dezenvolve no hadi’a-aan no buka solusaun ba povu nia problema.

“Nu’udar timor-oan tenke simu realidade durante tinan-20, Timor-Leste nia prosesu tomak mesmu hasoru difikultadade maibé hanesan estadu tenke kontinua hakat ba oin,” Alari akresenta.

Entretantu, Prezidente Republika José Ramos Horta iha ninia diskursu bainhira simu pose hateten sei promove diálogu entre lider nasionál, partidu polítiku ne’ebé asentu parlamentár no kamada sosiál hotu atu hamutuk buka solusaun ba problema iha rai-laran.

Jornalista    : Natalino Belo

Editor           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here