Inpertór serimonia isár bandeira 20 maiu, halo pasa revista ba formatura. Imajen Tatoli/Celestina Teles.

COVALIMA, 20 maiu 2022 (TATOLI)–Reprezentante Governu liuhosi Sekretáriu Estadu Ambiente, Deométrio do Amaral de Carvalho, husu ba sidadaun sira atu mantein estabilidade no armónia hodi bele kontinua hala’o dezenvolvimentu.

Notísia Relevante: Tinan 20 TL independénsia, povu Covalima kontinua halerik ba bee-moos

Serimónia komemorasaun loron restaurasaun independénsia Timor-Leste ba dala-XX (20 maiu 2002-20 maiu 2022) iha Covalima ne’e, Konsellu Ministru deside, Sekretáriu Estadu Ambiente, Deometro do Amaral de Carvalho, sai inspetór ba serimónia isár bandeira.

“Ita-nia dalan ba moris di’ak no estabilidade depende ba sidadaun hotu, komemora restaurasaun independénsia ida-ne’e fó ita atu hanoin, tanba ema na’in rihun 200-resin mak fó sira-nia an hodi liberta ita-nia rai ida-ne’e nia kustu ne’e todan. Nune’e ita atu halo dezenvolvimentu ho di’ak ema hotu partisipa no mantein estabilidade armónia atu dezenvolvimentu la’o di’ak, nune’e Timor-Leste bele goza moris di’ak,” Governante ne’e hateten ba jornalista sira, iha Kampu Ladi, sesta ne’e.

Nia sente haksolok destaka iha Covalima hodi komemora loron independénsia ba dala-XX ho programa barak tebes hanesan reativa organizasaun arte marsiál no arte rituál sira, ne’e hatudu sinál di’ak atu fó fila ba joven sira bele organiza malu hola parte iha prosesu dezenvolvimentu ida-ne’e.

Tanba ne’e, nia hato’o parabéns ba administradór ho nia estrutura iha munisípiu Covalima tanba komemora loron independénsia ba dala-XX ho di’ak no partisipa másimu hosi komunidade.

Entretantu, serimónia komemorasaun independénsia Timor-Leste ba dala-XX ne’e autoridade Covalima prevee orsamentu $12,739.00 hodi orsamentu ne’e, aloka ba seksaun sekretáriu komisaun organizadora prevee $848.50, isar bandeira nasionál $1,704.50, parada formatura $909.00, lojístika $387.00.

Ba seksaun liturjia prevee $429.00, limpeza $119.00, konsumsi $1,040.00, protokolu $203.50, kompetisaun sertame diskursu públiku $952.50, kurrida de Cavalo $4,717.00, dekorasaun $358.50, seguransa patromóniu $24,50, animasaun kultura $924.00, primeiru sokorru $122.00 maibé seksaun mobilizasaun masa la prevee orsamentu.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here