Labarik sira kumprimenta Prezidente Repúlika, José Ramos Horta, Prezidente Repúblika Portugal, Marcelo Rebelo de Sousa, inklui konvidadu importante sira Hafoin serimónia komemoraun loron restaurasaun independénsia Timor-Leste ba da-XX, iha Palásiu Prezidensiál, Bairro Pité, sesta (20/05). Imajen Tatoli/Francisco Sony

DILI, 20 maiu 2022 (TATOLI)—Kada tinan iha loron 20 maiu, Timor-Leste sempre komemora loron restaurasaun independénsia, nune’e iha tinan ne’e komemora loron istóriku ne’e ba da-XX (2002-2022).

Bainhira serimónia restaurasaun indepedénsia atu hahú iha Palásiu Prezidensiál, Bairro Pité, Prezidente Repúblika, José Ramos Horta haruka membru Polísia Nasionál Timor-Leste (PNTL) loke portasaun no haruka labarik no komunidade tama hodi partisipa serimónia ne’e.

Hafoin ramata serimónia isar bandeira nasionál, Horta konvida labarik sira sa’e palku, hamutuk ho bainaka importante sira hodi komprimenta.

Nune’e, situasaun ne’e atrai tebes joven, katuas no ferik, hamutuk sa’e ba palku leten hodi hasai foto hamutuk ho Prezidente Repúblika foun, maibé iha minutu balun de’it parte seguransa hapara, hodi fó biban ba bainaka importante sira deskansa no partisipa fali ajenda ne’ebé planeia ona.

Labarik ho idade sia, Carlito da Silva, hato’o nia sentimentu kontente tanba bele partisipa serimónia istóriku ne’e.

“Ha’u sente kontente tebes bainhira serimónia atu hahú, avo Ramos Horta bolu ami tama mai Palásiu laran hodi partisipa serimónia restaurasaun indepedénsia no bainhira ramata, avo bolu tan ami simu cocktail no bensa avo Ramos nia liman no Prezidente Portugal, Marcelo Rebelo de Sousa. Ha’u sente kontente tebes tanba avo la siak, maibé hadomi ami,” Carlito da Silva hateten ba Agência Tatoli, iha Palásiu Prezidensiál.

Notísia relevante: PR Horta konvida labarik sira kumprimenta PR Portugál Marcelo Rebelo

Nune’e mós, labarik ho idade sia, Nencia Maria, sente kontente tanba bele partisipa direta serimónia.

“Ha’u kontente tebes bainhira ami tama mai ema la siak ami, ha’u gosta loos avo Ramos no hakarak ba oin avo Ramos nafatin hadomi ami hanesan ne’e,” nia dehan.

Teresa Maria ho idade 11, sente haksolok tanba foin ba dahuluk tama iha Palásiu Prezidensiál no partisipa direta serimónia boot.

“Ha’u kontente tebes mai fatin ne’e, tanba ha’u foin tama dahuluk mai fatin ne’e. Ha’u gosta avo Ramos tanba nia hadomi ami,” nia tenik.

Durante serimónia restaurasaun independénsia ba da-XX, maski loron manas maibé labarik no komunidade ho antusiazmu boot partisipa.

Jornalista : Arminda Fonseca

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here