Administradór postu Uatulari, Manuel do Rosário. Imajen Tatoli/Vitorino Lopes da Costa

VIQUEQUE, 20 maiu 2022 (TATOLI)–Administradór postu Uatulari, Manuel do Rosário, husu Governu tau-matan ba komunidade ne’ebé moris iha área rurál tanba barak mak seidauk seidauk asesu infraestrutura bázika.

“Ita restaura independénsia ba da-XX, maibé  komunidade ne’ebé hela iha área rurál  to’o agora barak maka seidauk asesu ba eletrisidade, bee-moos no estrada di’ak,” Autoridade postu hateten ba Agência Tatoli, hafoin partisipa serimónia komemorasaun loron restaurasaun independénsia ba da-XX, iha suku Afaloikai, postu administrativu Uatulari, sesta ne’e.

Notísia relevante: Autoridade Viqueque konsidera presiza esforsu aselera dezenvolvimentu nasionál

Iha fatin hanesan, Veteranu postu Uatulari, Afonso da Silva ‘Kalik’, reforsa povu iha área rurál presiza liu infraestrutura bázika hodi bele hala’o moris loron-loron.

“Ha’u haree dezenvolvimentu ne’ebé la’o iha tinan 20 nia-laran, liuliu povu Uatulari iha área rurál seidauk asesu eletridade no estrada. Iha postu Uatulari, estrada ladi’ak hosi Uatulari bá munisípiu Viqueque, estrada a’at difikulta movimentu transporte,” nia dehan.

Nune’e, nia husu órgaun soberanu bele servisu hamutuk hodi haree ba prosesu dezenvolvimentu nasionál ba povu nia moris di’ak.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here