Autoridade postu Uatulari ne'ebé partisipa iha komemorasaun restaurasaun independénsia ba da-XX, iha suku Afaloikai, sesta (20/05). Imajen Tatoli/Vitorino Lopes da Costa

VIQUEQUE, 20 maiu 2022 (TATOLI)—Xefe suku Afaloikai, postu administrativu Uatulari, Constantino Guterres, agradese ba entidade sira ne’ebé kontribui ona finanseiru hodi komemora loron restaurasaun independénsia ba da-XX iha munisípiu Viqueque.

“Ha’u agradese ba Governu liuhosi Ministériu Administrasaun Estatál (MAE), komunidade hosi suku Afalokai no suku lima iha postu administrativu Uatulari, funsionáriu, veteranu, inklui empreza sira ne’ebé fó apoiu orsamentu hodi komemora loron importante ida-ne’e,” Autoridade lokál informa ba Agência Tatoli, hafoin ramata serimónia isar bandeira nasionál, iha suku Afaloikai, sesta ne’e.

Notísia relevante: Komisaun organizadora restaurasaun independénsia iha Viqueque husu misa agradesimentu ba eroi

Tema ne’ebé suku Afaloikai foti ba komemorasaun loron nasionál ne’e mak: ‘Ho Espíritu restaurasaun independénsia, ita hametin unidade, estabilidade no responsabilidade ba dezenvolvimentu nasionál.’

Xefe suku ne’e konsidera, loron restaurasaun indepedénsia importante tebes ba povu tomak, tanba ne’e povu hetan ona ninia independénsia.

Komunidade lokál no veteranu sira partisipa iha komemorasaun restaurasaun independénsia ba da-XX, iha suku Afaloikai, sesta (20/05). Imajen Tatoli/Vitorino Lopes da Costa

Apoiu ne’ebé komisaun organizadora hetan hosi MAE hodi komemora loron istóriku ne’e, ba postu Uatulari hamutuk $750.

Aleinde ne’e, ho esforsu hosi komisaun organizadora, hetan apoiu kontribuisaun hosi entidade sira hanesan komunidade Afaloikai, empreza, veteranu, funsionáriu no eskola sira iha postu Uatulari ho totál orsamentu $2.000.

Iha komemorasaun restaurasaun independénsia, komisaun organizadora realiza atividade jogu tradisionál hanesan bola guling no futu manu, hahú   loron 16 to’o 20 maiu, ne’ebé durante atividade sira ne’e, gosiante kiik sira aproveita fa’an sasán.

Iha fatin hanesan, Administradór postu Uatulari, Manuel do Rosário, konsidera komemorasaun loron 20 maiu importante tebes tanba durante funu naruk povu barak maka terus, tanis no hetan sofrimentu oin-oin.

“Restaura independénsia tanba ita iha independénsia unilaterál iha tinan 1975, funu naruk ne’ebé povu Timor-Leste enfrenta balun lakon vida no balun moris to’o oin loron. To’o tempu ida-ne’e, ita ukun-an ona, ita tenki restaura independénsia, iha funu ita hotu hetan terus laran. Dala barak ha’u sempre ko’alia, ita ema  moris iha mundu susar ida mai, ita hotu susar, tanba susar ita tenki susar, terus ita tenki hasai matan-been durante tinan 24 ba kotuk. Maibé ohin loron ita hotu haksolok hamutuk iha restaurasaun independénsia,” nia akresenta.

Biban ne’e, Autoridade postu husu ba joven sira atu buka hatene inan-aman ninia istória iha luta libertasaun.

“Hetan independénsia  povu balun mate,  balun sei moris. Tanba ne’e, ha’u husu joven sira buka hatene inan-aman sira-nia istória hodi rai hela ba oan no bei-oan sira, tanba difisil tebes iha tempu okupasaun nian laran,” nia hato’o.

Atividade ne’e partisipa hosi autoridade lokál sira, Polísia Nasionál Timor Leste (PNTL) Eskuadra Uatulari, veteranu, família hosi hosi mártires eroi sira, funsionáriu, estudante  inklui komunidade lokál.

Atividade parada ba isar bandeia responsável hosi estudante Uatualari hamutuk na’in-43 no hahú isar bandeira tuku 10:00 dader no hatun bandeira iha tuku 16:00.

Hafoin hatún bandeira, iha tuku 17:00 komunidade kontinua atividade lori ai-funan no lilin hodi ba   krus eroi postu Uatulari, iha uma mahon restu mortál, iha postu adiministrativu Uatulari, munisípiu Viqueque.

Jornalista : Vitorino Lopes da Costa

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here