Ilustrasaun. Imajen/Espesiál.

DILI, 19 maiu 2022 (TATOLI)—Diretór Ezekutivu Asia Justice and Right (AJAR), José Luis de Oliveira, informa feto no labarik feto sira atu hetan direitu no livre hosi violénsia tenke brani no presiza luta hodi labele tauk hateten sai ba ema seluk.

Notísia Relevante: Peskiza kona-ba violénsia hasoru feto, AJAR deskobre pontu importante 10

 “Ba feto no labarik feto iha direitu no livre hosi violénsia ne’ebé ita hetan bainhira ita konkista signifika ita tenke luta. Primeiru ita tenke hahú kedas ita-nia an rasik bainhira akontese violénsia, labele nonook no tenke hateten sai. Dala barak família rasik halo presaun maibé tenke hahú entaun esforsu mak ita bele dehan lae ba violénsia,” José hateten ba Agência TATOLI, iha nia knar fatin Palpaso, Dili, tersa (12/05).

Timor-Leste nia independénsia halo ona tinan 20 ne’e la’ós tempu ida-ne’ebé badak, tuir loloos líder sira tenke halo buat ruma ne’ebé di’ak ba komunidade, nune’e feto no labarik feto sira bele sente katak sira goza duni Timor-Leste nia independénsia ne’e.

Fasil tebes ukun-na’in sira dehan liberta pátria no liberta povu maibé iha aniversáriu loron restaurasaun independénsia Timor-Leste ba dala-XX (20 maiu 2002-20 maiu 2022) ne’e, iha ema balun ne’ebé seidauk libertadu liu-liu feto no labarik feto sira tanba sira sei moris iha susar no mukit nia laran.

“Uluk ita-nia maun boot balun dehan ita tenke liberta pátria no liberta povu, maibé ukun an tiha, ita-nia maluk balun seidauk libertadu. Tanba uluk halo violénsia ne’e hosi ema kolonialista sira maibé depois ita ukun-an tiha ita mak kontinua halo violénsia ba malu,” nia dehan.

Agora tempu ona tanba liberta ona povu entaun tenke liberta feto no labarik feto sira hosi violénsia ho forma oioin, nune’e sira mós goza netik karan hosi independénsia ne’e.

“Maibé ida-ne’e tempu ona ita atu refleta, ita-nia governante sira tenke halo reflesaun tanba tinan 20 ne’e la’ós tempu badak. Nune’e, sira tenke refleta ba sira-nia dezempeñu ne’ebé durante ne’e sira halo,” José dehan. 

Iha tinan 20 nia laran ne’e, Governu nia dezempenu to’o iha ne’ebé ona nune’e tempu ona atu halo mudansa ne’ebé signifikante, maibé infelizmente ema barak liu-liu feto no labarik feto sira seidauk sente livre hosi violénsia.

“Ha’u husu ba polítika na’in sira atu hadi’a no mellora ita-nia polítika atu asegura katak feto no labarik feto mós bele goza sira-nia liberdade iha independénsia ba dala-XX ona ne’e,” nia dehan.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here