Ne'e mak preparasaun finál iha Tasitolu ba tomada pose prezidente eleitu, Ramos Horta, kuarta, (18/5/2022). Imajen TATOLI

DILI, 18 maiu 2022 (TATOLI)-José Manuel Ramos Horta, Prezidente Repúblika eleitu ho maioria votu 398.028 ekivale ba pursentu 62,1 hosi totál eleitór 646.389, iha loron kinta, 19 sei jura ba Maromak no povu hodi halo tuir de’it konstituisaun no lei oan sira atu hametin ukun-an no mos unidade Nasaun-nian.

Koordenadór La’o Hamutuk, Celestino Gusmão

“Espera katak Prezidente Repúblika foun bele konsiente, halo reflesaun kle’an uitoan ba ita-nia realidade sósiu-ekonómiku ida ne’e, nune’e ita hothotu hanesan Estadu, Prezidente Repúblika, Governu ho Parlamentu Nasionál inklui Tribunál no instituisaun Estadu sira hotu hamutuk atu serbí objetivu ida de’it”, Koordenadór La’o Hamutuk, Celestino Gusmão hatete iha entrevista ho Tatoli, foin lalais ne’e.

Tuir nia, polítiku sira presiza hamutuk atu rekoñese problema estruturál ne’ebé eziste tinan barak ho sosiedade Timór hanesan má-nutrisaun krónika, númeru ki’ak, dezempregu, dependensia ba petróleu no importasaun, kualidade edukasaun no saúde ne’ebé problema, bee no saneamentu.

Objetivu Estadu, tuir La’o Hamutuk mak buka dalan oinsá mak bele atinje moris di’ak ba povu, ho prósperu no justu.

“Dala-barak ita diskute, sé mak iha kompeténsia liu no sé mak la iha kompeténsia – Governu, Parlamentu, Prezidente Repúblika, maibé ami-nia esperansa katak hotu-hotu hanoin fó sira-nia enerjia, matenek, tempu, atu tuur hamutuk ajuda-malu”, katak nia.

Nia hatutan: “Prezidente Repúblika iha kbiit kada-semana hasoru-malu ho Primeiru-Ministru, Prezidente Parlamentu Nasionál, Tribunál no instituisaun Estadu sira, aproveita tempu sira ne’e fó nia kbiit, atu fó influénsia ba dezenvolvimentu ne’ebé produtivu no sustentável liu”.

“Hakarak kongratula Prezidente eleitu, José Ramos Horta ne’ebé sei simu pose, hanesan sosiedade sívil no mós timoroan, husi mudansa polítiku ida ne’e bele lori esperansa”, kongratula nia.

Espetativa seluk hosi akademista Universidade Oriental Timor Lorosa’e (UNITAL), Felicidade Xavier mak hametin kooperasaun ne’ebé Timor halo ona.

Dekana CISPOL, Felicidade Xavier

Dekana Fakuldade Siénsia Sosiál no Polítika hatutan: “Prezidente Repúblika tenke influénsia ezekutivu sira atu bele haree ba edukasaun”.

Nia afirma Prezidente Repúblika no Ezekutivu tenke iha kooperasaun ne’ebé di’ak atu influénsia ba malu hodi tau-prioridade ba setór edukasaun.

“Ha’u apresia 100% ba nia (Prezidente José Ramos Horta), ha’u-nia parabéns tak terhingga (rohan-laek) ba nia, tanba sai ona Prezidente Repúblika no agora nafatin sai Prezidente Repúblika”, Felicidade kongratula.

Padre Paroku Ai-mutin, Imanuel Lelo Tatolok. Imajen TATOLI/Francisco Sony

Autoridade relijioza, Padre Emanuel Lelo Talo, CMF nu’udar Amo paróku Ai-mutin, Dili, rekoñese Prezidente eleitu nu’udar figura no líder timoroan ida ne’ebé iha esperiénsia.

“Mai ita suport (apoiu) avó Ramos nu’udar Prezidente eleitu atu dezenvolve Timor-Leste”.

Pe. Emanuel Lelo Talo parabeniza: “Ba Prezidente eleitu, ami hato’o parabéns, hala’o knaar ho di’ak: hahú ho di’ak, haninin ho kmanek. Parabéns”.

Diretór Ezekutivu PERMATIL, Ego Lemos. Imaen TATOLI/António Gonçalves

Kongratulasaun seluk maihosi Permakultura Timor-Leste (PERMATIL). “Ha’u lori Permatil nia naran no staff hotu, membru voluntáriu hotu no mós komunidade ne’ebé durante ne’e serbisu iha konservasaun rekursu bee no mós ekolójiku, ami hakarak hato’o kongratulasaun ba Dr. José Ramos Horta ne’ebé mak atu simu pelantikan (tomada pose) iha 20 maiu”, Diretór Permatil, Ego Lemos, hodi ekipa tomak hato’o kongratulasaun, iha nia knaar-fatin, Palapasu, Dili.

Iha parte seluk, joven feto timoroan ida, Joaninha Lopes Soares, dezeja: “Hakarak hato’o parabéns ba ita-boot (Prezidente repúblika), fiar katak iha forsa no iha posibilidade atu kaer knaar ne’ebé mak ita-boot hetan”.

Estudante IOB (Instituto of Bussiness), Jania C.S. Tilman

Nune’e mós, Estudante IOB (Instituto of Bussiness), Jania C.S. Tilman kongratula: “Hakarak hato’o parabéns ba Doutór Ramos Horta”.

Durante tinan lima ne’e, nia hatutan: “Bele halo tuir no kumpre duni ita-boot nia kompromisu tanba ho kompromisu sira ne’e mak halo ami povu laran monu, keta haluha toma responsabilidade. Ikusliu, parabéns no lori Timor ba mundu”.

José Ramos Horta manan eleisaun prezidensiál segunda volta ho votu 398.028 (62,1%) kompara ho Francisco Guterres ‘Lú Olo’ ho votu 242.239 (37,9%) – válida husi Tribunál rekursu (TR) iha sesta (29/04), depois prosesu verifikasaun no validasaun akta husi CNE.

Nune’e, iha loron 20 maiu 2022, iha ámbitu komemorasaun ba restaurasaun independénsia ba dala-20, prezidente eleitu ba périodu 2022 – 2027, José Ramos Horta, sei simu pose iha Tasi Tolu, Dili, Timor-Leste, tuir konstituisaun RDTL artigu 77 (Simu knaar no juramentu).

Bainhira simu pose, Prezidente repúblika sei hala’o nia kompeténsia tuir Konstituisaun, hanesan define iha artigu 85 (Kompeténsia rasik), 86 (Kompeténsia kona-ba órgaun sira seluk) no 87 (Kompeténsia kona-ba relasaun internasionál).

Notísia relevante: Eleisaun segunda volta: la’ós Ramos Horta maibé povu TL mak manán

Jornalista  : Rafy Belo

Editora      : Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here