Prezidente Repúblika, Francisco Guterres "Lú Olo". Imajen Tatoli/Egas Cristovão.

DILI, 19 maiu 2022 (TATOLI)—Prezidente Repúblika, Francisco Guterres Lú Olo, promulga ona Dekretu-Lei Númeru 22/2022, 11 maiu,  kona-ba Rejime Jurídiku Aprovizionamentu, Kontratu Públiku no nia Infrasaun sira.

“Dekretu-Lei ne’ebé Xefe Estadu promulga ona ne’e sei simplifika prosedimentu aprovizionamentu hosi tipu prosedimentu hitu (7) ba tolu (3) de’it, hanesan mellora  sistematizasaun no deskrisaun detalla hosi kada faze aprovizionamentu, promove transparénsia ho reforsu hosi portál aprovizionamentu, reforsu  prosesu planeamentu no reforsu atribuisaun sira ba komisaun nasionál aprovizionamentu,” refere nota imprensa ne’ebé Agência TATOLI asesu, kinta ne’e.

Dekretu-lei ne’e sei troka rejime jurídiku atuál tolu ne’ebé aprova iha 2005 no iha ona vijénsia durante tinan 17 nia laran, hanesan rejime jurídiku aprovizionamentu, rejime jurídiku kontratu públiku no infrasaun administrativa sira.

Diploma foun ne’e sei integra rejime jurídiku atuál tolu ba iha úniku rejime jurídiku ida de’it no diploma ne’e sei entra em vigor hahú iha 1 janeiru 2023 hodi fó biban ba funsionáriu sira hosi departamentu governamentál atu tuir sesaun traballu ka formasaun molok implementa.

Dekretu-Lei foun ne’e hanesan diploma importante ida hosi  diploma  neen (6) ne’ebé VIII Governu Konstitusional prepara hodi apoiu implementasaun Lei Enkuadramentu Orsamentál-Lei Estruturante ida-ne’ebé mak Prezidente Repúblika, Francisco Guterres Lú Olo promulga ona iha 9 fevereiru  2022.

Dekretu-lei foun ne’e aliña ho programa VIII Governu Konstitusionál liu-liu iha reforma jestaun finansa públika liuhusi diversifikasaun finanseira iha área reseita no despeza, mellora sistema aprovizionamentu, fortalese desentralizasaun finanseira no orsamentu ho baze ba programa.

Proposta dekretu Lei ne’e, Ministru Finansa, Rui Gomes aprezenta ba Konsellu Ministru tanbá konsidera despeza públiku iha pezu boot tebes ba iha Timor-Leste nia produtu internu  brutu no ekonomia nasionál liu-liu iha despeza ne’ebé rezulta hosi prosedimentu aprovizionamentu.

Tanbá ne’e, simplifika aprovizionamentu no kontratu públiku sei fó impaktu pozitivu ba iha ekonomia nasionál.

Aleinde ne’e, Governante ne’e mos konsidera katak importante tebes atu aprova rejime jurídiku úniku ida-ne’ebé mais klaru, simples, objetivu, rigorozu no transparente hodi promove dezenvolvimentu ekonómiku no sosiál.   

Antes aprezenta ba Konsellu Ministru, Ministériu Finansa (MF) halo ona konsultasaun ho departamentu governamentál no rekolla ona paresér hosi liña ministériu sira.

Ministériu Finansa mós realiza reuniaun tékniku ho reprezentante banku mundiál  no banku dezenvolvimentu aziátiku iha ámbitu ezersísiu ba avaliasaun sistema aprovizionamentu Timor-Leste.

Jornalista : Nelson de Sousa

Editór        : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here