Prezidente Portugál, Marcelo Rebelo de Sousa, kondekora Prezidente RDTL, Francisco Guterres "Lo Olo", iha Palásiu Prezidensiál Nicolau Lobato, Bairru Pite, Dili, kuarta (19/05) ne’e. Imajen Tatoli/Francisco Sony.

DILI, 19 maiu 2022 (TATOLI)—Prezidente Repúblika Portugál, Marcelo Rebelo de Sousa, reafirma mantein amizade permanente ho Estadu no Povu Timor-Leste entre Estadu no povu Portugál.

Notísia Relevante: PR Lú Olo sei simu kondekorasaun Grande-Kolar hosi Portugál

“Ho konsiderasaun boot no forma permanente akompañamentu fraternál tebes,” Prezidente Portugál ne’e hato’o lia hirak ne’e bainhira kondekora Grande Colar da Ordem do Infante Dom Henrique ba nia ómologu Prezidente Repúblika, Francisco Guterres Lú Olo, iha Palásiu Prezidensiál Nicolau Lobato, Bairru Pite, kinta kalan ne’e.

Xefe Estadu Portugál ne’e hateten, durante mandatu Xefe Estadu Timor-Leste exerse funsaun hasoru dezafiu boot dura iha tinan hirak ne’e ligadu ho pandemia COVID-19 fó afeta ba área oioin, alleinde mundiál iha kontextu jeopolítiku hasoru dezafiu akompaña ekonomia.

“Durante mandatu hasoru dezafiu lubuk, purtantu iha oras balun tan exelensia nia mandatu sei ramata. Aproveita momentu ne’e, ha’u propriu Prezidente (Portugál) entrega kondekorasaun grande kolár ba ita (Prezidente Repúblika Timor-Leste, Francisco Guterres Lú Olo),” nia hateten.

Kondekorasaun Grande Colar da Ordem do Infante Dom Henrique atribui ba sira-ne’ebé hala’o servisu relevante ba Portugál, iha País no estranjeiru, hanesan mós servisu ba espansaun kultura portugeza ou ba koñesimentu Portugál nia istória no ninia valór.

Grande-Colar da Ordem do Infante Dom Henrique nu’udar grau Orden ida-ne’ebé aas liu atribui hosi Prezidente Repúblika ba Xefe Estadu país estranjeiru.
Grande-Colar atribui mós hosi Prezidente Repúblika ba antigu Xefe Estadu ka ema sira-ne’ebé iha natureza estaordinária no relevánsia espesiál ho Portugál ne’ebé merese atu simu grau Orden ida-ne’e.

Prezidente Repúblika Portugál ne’e mós hakarak louva Timor-Leste liuhosi nia instituisaun sira realiza eleisaun liu ba hatudu ho demokrátika no livre iha rejiaun no mundu.

Prezidente Repúblika, Francisco Guterres Lú Olo, lori Estadu no povu Timor-Leste nia naran agradese ba kondekorasaun hosi ómologu Portugeza no reafirma mós povu no Estadu Timor-Leste nia naran sei hametin liután ida forte ho Portugál.

Notísia Relevante: Xefe Estadu sei kondekora PR Portugés no Governadór-Jerál Australiano 

Entertantu Xefe Estadu, Francisco Guterres Lú Olo mós fó kondekorasaun ba Prezidente Repúblika Portugál, Marcelo Rebelo de Sousa no Governadór-Jerál Australia, David John Hurley, ho grau Grande-Kolar.

Prezidente Repúblika Portugál, Marcelo Rebelo de Sousa, nu’udar sidadaun mundu nian ne’ebé defende valór universál hanesan pás, liberdade no auto-determinasaun povu, liberdade espresaun, fraternidade entre povu hosi nasaun oioin no valór seluk ne’ebé sai komun ba timor-oan sira.

Iha Dekretu Prezidente Repúblika númeru 28/2022, 18 maiu, hateten iha tinan 20 restaurasaun indepedénsia domin ne’ebé Prezidente Marcelo Rebelo de Sousa sente ba Timor-Leste no hosi Povu Timorense, Xefe Estadu Lú Olo pesoalmente sente domin hosi timor-oan ba Portugál, ba portugés no língua portugeza.

Governadór Jerál Austrália nu’udar belun boot Timor-Leste nian ligasaun atuál Governadór Jerál Australia ho Timor-Leste hahú tiha ona molok restaurasaun indepedénsia.

David Hurley, komanda Primeira Brigada iha 1999 no 2000 iha Darwin apoiu operasaun lidera hosi Austrália iha Timor-Leste durante períodu ne’e.

Iha Dekretu Prezidente Repúblika númeru 29/2022, 18 maiu, nian katak David Hurley, Governadór Jerál Australia, desde 2019 kontinua guia nia komportamentu atu hasa’e sentidu Estadu ne’ebé karáteriza, hametin relasaun amizade entre Estadu no povu Timor-Leste no Austrália.

Agora mak to’o ona momentu katak Repúblika Demokrátika de Timor-Leste no povu Timorense rekoñese ho gratidaun papél ne’ebé dezenvolve hosi David Hurley.

Orden Timor-Leste kria hosi Dekretu-Lei númeru 20/2009, 6 maiu, ho objetivu atu rekoñese no agradese nasionál no estranjeiru, tanba sira-nia komportamentu ka aktu ne’ebé sira prátika iha kontributu signifikativu ba benefísiu país, timor-oan ka umanidade.

Orden Timor-Leste iha grau haat, ida mak Grande-kolar. Grande-Kolar atribui eskluzivamente atu agrasia Xefe Estadu hosi nasaun soberanu.

Entertantu, serimónia kondekorasaun ne’e Xefe Estadu Timor-Leste hala’o mós jantar konfraternizasaun ne’ebé partisipa hosi Prezidente Repúblika Eleitu, José Ramos Horta, Primeiru Ministru, Taur Matan Ruak, Prezidente Parlamentu Nasionál, Aniceto Longuinhos Lopes, Prezidente Tribunál Rekursu, Deolindo dos Santos, membru VIII Governu Konstituisionál, bainaka espesiál, korpu diplomátiku ho seluk tan.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here