Prezidente Repúblika,Francisco Guterres Lú Olo. Imajen Tatoli/António Gonçalves.

DILI, 19 maiu 2022 (TATOLI)—Prezidente Repúblika, Francisco Guterres Lú Olo, kuarta (18 maiu 2022) horisehik, promulga Dekretu-Lei subsídiu iha tinan nia rohan ba uma-kain ho montante fiksu $200.

Notísia Relevante: Governu aprova subsídiu $200 ba uma-kain sira

“Subsídiu ba uma-kain iha tinan nia rohan ho objetivu atu apoiu ekonomia ba família sira-ne’ebé vulnerável liu hodi hetan benefísiu osan ba selebrasaun festa iha tinan nia rohan,” refere komunikadu imprensa ne’ebé Agência Tatoli asesu hosi Palásiu Prezidensiál Nicolau Lobato, kinta ne’e.

Anualmente iha tinan nia rohan, Governu aprova halo pagamentu estraordináriu ho saláriu adisionál ba funsionáriu no ajente Administrasaun Públika no traballadór nacionál sira seluk.

Maibé halo pagamentu hosi parte Estadu ba traballadór sira hosi instituisaun públika sira kria desigualdade no injustisa sosiál ba sidadaun sira seluk, espesialmente ba sira-ne’ebé la hetan rendimentu mensál regulár ka laiha serbisu, tanba sira-ne’e mak tenke hetan benefísiu sosiál hosi Estadu.

Benefisíariu sira hosi subsídiu iha tinan nia rohan mak uma-kain sira-ne’ebé rejistadu iha “Livru Rejistu Uma Kain” iha suku sira iha territóriu nasionál tuir Diploma Ministerial númeru 49/2017, 23 agostu, no prezente hela iha territóriu nasionál bainhira halo pagamentu.

Uma-Kain sira-ne’ebé sei hetan subsídiu ne’e mak uma-kain ho rejistu efetuadu to’o 28 fevereiru 2022 no bainhira auzente iha tempu halo pagamentu tenke aprezenta justifikasaun ne’ebé bele simu. 

Jornalista : Antónia Gusmão

Editór       : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here