Prezidente Repúblika, Francisco Guterres Lú olo. Imajen Tatoli/Francisco Sony.

DILI, 19 maiu 2022 (TATOLI)—Prezidente Repúblika, Francisco Guterres Lú Olo, lori Estadu nia naran hato’o obrigadu no agradese ba funsionáriu hotu iha Palásiu Prezidensiál ninia servisu hotu hamutuk ho nia durante mandatu 2017-2022.

“Ikus liu, ha’u hakarak iha ne’e ho kuñesimentu no esperensia kona-ba asuntu polítiku no mós jurídiku, administrasaun finansa hato’o hosi funsionáriu kolaboradór sira mak fó
kbiit mai ha’u nu’udar Prezidente Repúblika atu foti desizaun Estadu no nasaun Timor-Leste ninian. Hau lori Estadu nia naran hato’o obrigadu ba hotu-hotu,” PR Lü hato’o iha nia diskursu bainhira hala’o jantar konfraternizasaun ho funsionáriu Palásiu Prezidensiál no kolaboradór hotu iha Palásiu Nobre Lahane, Dili, kuarta ne’e.

Nune’e, Xefe Estadu hateten, ohin ne’e hasoru malu dala ikus nu’udar kolega servisu durante tinan lima, ikus liu iha fatin istóriku ida-ne’e.

“Ha’u hein katak hosi ohin ba oin, ita hotu sei hatutan relasaun amizade ne’ebé iha mandatu nu’udar Prezidente Repúblika ba períodu 2017-2022,” Lú Olo hateten.

Biban ne’e, Prezidente Repúblika ho hakslok kondekora orden Timor-Leste ba padre João Felgueiras no Teresa no Ana Mónica, funsionáriu no kolaboradore Prezidénsia Repúblika nu’udar rekoñesimentu no valorizasaun ba sira-nia servisu ho exelénsia no dedikasaun liuhosi knar oioin nu’udar voluntáriu ne’ebé kontribui ba benefísiu Timor-Leste ba timor-oan no ba umanidade.
Ba maluk servisu no kolabora servisu ne’ebé de’it durante mandatu hosik hela kuñesimentu no valorizasaun, liuhosi kondekorasaun ida-ne’e no sertifikadu apresiasaun ba ida-idak nia kontribuisaun.

“Atu ha’u bele kumpre kompromisu nu’udar Prezidente Repúblika ne’ebé louva imi hotu-hotu nia kontribuisaun nu’udar traballadór limpeza nian hanesan jardineiru, pesoál seguransa no funsionáriu públiku hosi eskalaun kiik to’o kargu xefia hotu iha Palásiu Prezidensiál Repúblika nian nomós kontratadu sira liuhosi nomeasaun polítika,” nia dehan.

Nia dehan, hasoru malu ba dala uluk iha Palásiu Prezidente Nicolau Lobato iha tinan 2017 sempre konta ho funsionáriu hotu.

“Ha’u sempre konta ho funsionáriu públiku sira tanba imi mak na’in prinsipál ba mákina funsionamentu Prezidensia Repúblika nu’udar instituisaun Estadu no imi mak garante memória instituisionál ba ita-nia rai Timor-Leste,” nia hateten.

Nune’e, fiar katak funsionáriu ida-idak sei kumpre devér atu hato’o memória instituisionál ne’ebé PR atuál ho nia ekipa konfiansa polítika husik ba Prezid’ensia tuir mai ho Prezidente Repúblika foun José Ramos Horta ho nia ekipa.

Servisu tranzisaun nian la’o dadauk ona no fiar katak ekipa nia parte hamutuk ho koordenadór hotu sei halo entrega servisu materiál eskritóriu no ekipamentu hotu-hotu ho termu entrega ba ekipa tranzisaun PR eleitu nian.

“Hein katak funsionáriu públiku hametin an nafatin nu’udar servidór Estadu nian ho étika profisionál, nune’e sei la sees an hosi sira-nia dever profisionál atu kaer servisu ho imparsialidade iha tempu ne’ebé de’it, biar ita ida-idak tama ba iha partidu polítiku ne’ebé de’it,” nia apela.

PR Lú Olo nafatin apela ba funsionáriu públiku ho kolaboradór hotu atu hakat ba oin nu’udar servidór ida iha instituisaun públiku ka privadu prosesu aprendizajen nunka hotu iha ita-nia moris tomak, kuñesimentu ema-nian evolui hosi tempu ba tempu atu hatán ba nesesidade organizasaun ida-nian hodi serbi di’ak liután.

Sai servidór, ida-idak laos kumpre de’it nia dever ho exelente maibé nu’udar sidadaun tenke hakas an atu prodús kuñesimentu no hahalok foun ba instituisaun, komunidade, nasaun no tempu la para ema ida aprende beibeik.

“Fiar katak ha’u-nia ekipa ne’ebé mai hamutuk ho ha’u iha 20 maiu 2017, ho kontratu ikus mai liuhosi nomeasaun polítika se iha legadu di’ak ba Prezidente tuir mai atu hatutan, hadi’a knar instituisionál sira tan,” nia hateten.

Estadu hamutuk ho entidade hotu halo esforsu atu hasae kapasidade nasionál iha área oioin, sa’e bainhira rekursu umanu forte tanba ne’e to’o tempu atu hametin instituisaun nasionál no iha mandatu tinan lima liuba ne’e, formasaun sira konsiente hotu iha rai-laran ho objetivu atu hametin liután kapasidade nasionál.

Nia dehan, durante mandatu tinan lima hasoru impase polítiku oioin hahú kedas formasaun VII to’o VIII Governu Konstituisionál, inundasaun ho pandemia COVID-19 maibé liuhosi diálogu no esforsu hosi órgaun Estadu nian, no hosi organizasaun nasionál no internasionál oioin ho ajudu kooperasaun bilaterál no multilaterál no partisipasaun povu tomak nian konsege hakat liu impase polítiku no difikuldade umanitária.

Entertantu, iha serimónia jantar konfraternizasaun ne’e Prezidente Repúblika mós fó sertifikadu apresiasaun ba jornalista sira-ne’ebé durante ne’e destaka iha Palásiu Prezidente mak hosi mídia Agéncia Tatoli, I.P, RTTL, E.P, GMNTV, Timor Post, Tve, Indepedente no sira seluk tan.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here