Prezidente Repúlika períodu 2022-2027 emposadu, José Ramos Horta no Prezidente Repúblika sesante, Francisco Guterres ‘Lú Olo’ komprimenta malu, hafoin atribuisaun medalla Grande Colar Ordem de Timor-Leste, iha serimónia investidura iha Tasi-tolu, kinta (19/05). Imajen Tatoli/António Daciparu

DILI, 19 maiu 2022 (TATOLI)—Prezidente Repúblika (PR) emposadu, José Ramos Horta, fó kondekorasaun ba Prezidente Repúblika sesante, Francisco Guterres ‘Lú Olo’, ho medalla Grande Colar Ordem de Timor-Leste.

Atribuisaun medalla ne’e hafoin Horta simu pose hosi Prezidente Parlamentu Nasionál, Aniceto Longuinhos Guterres, no halo juramentu.

“Agradese ba Prezidente sesante Lú Olo, ba nia estimada kaben Cidália no mós nia oan-sira, ha’u dezeja felisidade boot, hodi hateten katak sira sei kontinua serbí ba kauza nobre sira, serbí sesante, no ha’u hatene katak ha’u sei bele konta nafatin ho sira-nia konsellu ne’ebé matenek,” Horta Hato’o diskursu iha serimónia investidura, iha Tas-tolu, kinta ne’e.

Notísia relevante: Ramos Horta kompromete sai Prezidente Repúblika ba povu tomak

Atribuisaun medalla ne’e bazeia ba Dekretu Prezidente Repúblika 38/2022, 20 maiu, nu’udar kostume antigu ne’ebé eziste iha nasaun hotu iha mundu, ne’ebé reprezenta rekoñesimentu nasaun no Estadu ba sidadaun no entidade ne’ebé asume knaar no fó benefísiu ba povu.

Ordem Timor-Leste kria hosi Dekretu-Lei númeru 20/2009, 06 maiu, destina hodi rekoñese no agradese ba servisu nasionál no internasionál ne’ebé hala’o hodi benefisia nasaun Timor-Leste no povu.

Iha biban hanesan, Prezidente Repúblika sesante, Lú Olo, hato’o parabéns no votu susesu ba José Ramos Horta hodi lidera nasaun no povu durante mandatu.

“Xefe Estadu tenke asegura solidariedade institusionál no interdepedénsia funsaun entre órgaun soberania,” Lú Olo hameno.

Francisco Guterres ‘Lú Olo asume ona knaar nu’udar Prezidente Repúblika ba períodu 2017-2022.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here