Prezidente Repúlika períodu 2022-2027 emposadu, José Ramos Horta no Prezidente Repúblika sesante, Francisco Guterres ‘Lú Olo’ komprimenta malu, iha serimónia investidura iha Tasi-tolu, kinta (19/05). Imajen Tatoli/António Daciparu

DILI, 19 maiu 2022 (TATOLI)— Populasaun iha esperansa ba José Ramos Horta ne’ebé ofisialmente simu pose (investidura) nu’udar Prezidente Repúblika (PR) ba períodu 2022-2027, hodi kontinu hametin pás no estabilidade durante nia-mandatu.

Prezidente Repúblika, José Ramos Horta ofisialmente simu pose, iha kinta ne’e, tuku 23:45 kalan, iha Tasi-tolu. Liuhosi serimónia solene ne’ebe hahú tuku 22:00, kalan ho sesaun plenária ne’ebé prezide hosi Prezidente Parlamentu Nasionál, Aniceto Longuinhos Guterres. 

Notísia relevante: Ramos Horta kompromete sai Prezidente Repúblika ba povu tomak

Biban ne’e, Negosiante ambulante iha Tasi-Tolu, Adriana Gonçalves, husu Prezidente Repúblika José Ramos Horta atu ukun ho estabilidade no páz hodi tau matan ba povu timór.

Negosiante Adriana Gonçalves.imajen/Felicidade Ximenes

“Ami husu ba  Prezidente Republika José Ramos Horta, katak ami hakarak rai ne’e hakmatek  iha pás nia-laran hodi ami povu ki’ik ka negosiante sira faan sasan ho di’ak hodi sustenta ami vida,” Negosiante ne’e hateten ba Agência TATOLI iha Tasi-Tolu.

Nia husu mós ba Xefe Estadu foun atu ukun ho loloos no hametin diálogu atu hamutuk haree povu tomak ne’ebé mak iha rai ne’e  hodi asesu ba  insfraestrutura bázika liuliu estrada, eletrisidade, no bee moos.

Negosiante Eurico Carvalho de Jesus.Imajen/Felicidade Ximenes

Iha biban hanesan, Negosiante Eurico Carvalho de Jesus, husu ba Prezidente  Repúblika José Ramos Horta atu koopera ho Governu atu haree ba kondisaun povu aileba nia moris.

“Ami husu ba Prezidente Repúblika atu haree mós ami povu aileba sira atu bele faan sasan ho  diak hodi bele sustenta família,” nia afirma.

Nune’e, Leonito Florindo mós iha esperansa ba Prezidente Repúblika Ramos Horta atu hametin diálogu ho líder nasionál sira hodi garante pás no estabilidade hodi hala’o dezenvolvimentu ba povu no nasaun.

“Ami iha esperansa ne’ebé boot tebes ba Prezidente Foun atu kontinua hametin dialogu hodi hamutuk halo dezenvolvimentu hodi kombate ki’ak no mukit,” nia afirma.

Alende ne’e,  Nia husu ba PR Horta tenke servisu ho komprimisiu ne’ebé mak hatoo durante iha tempu kampaña liuliu kona-ba promesa ba joven sira katak buka kampu traballu ba joven sira atu ba Japaun, Canada no Englaterra.

Komunidade Leonito Florindo.
Imajen/Felicidade Ximenes

“Tanba ne’e sai ona Xefi Estadu halo kooperasaun  entre nasaun sira atu fasilita  visa servisu   ba sidadaun  sira ba iha  nasaun Canada, Englaterra, Japaun   nomós  nasaun sira seluk atu nune’e ita nia joven sira servisu bele sustenta sira-nia familia no hasae rendimentu ekonomia iha ita-nia rai laran,” Nia informa.

Gabriel Oliveira de Araújo, nuudar ema ho kondisaun defisiénsia, hateten maski nia kondisaun fíziku ladi’ak, maibé la lakon ninia oportunidade hodi partisipa iha festa demokrasia liuliu serimónia investidura ba Prezidente Repúblika  eleitu  iha Tasi-Tolu

Komunidade Gabriel Oliveira de Araújo.Imajen/Felicidade Ximenes

“Ema hotu iha direitu hanesan hodi partisipa festa demokrásia ida ne’e,  entaun ha’u orgullu tebes hodi partisipa direita serimonia pose (investidura) ba Prezidente Jose Ramos Horta nian,” Gabriel kontente.

Alende ne’e, Alfredo do Carmo  husu ba prezidente Republika ba oin halo koordenasaun ho Governu atu hadi’a buat ne’ebé mak seidauk diak, atu nune’e povu moris iha sosiedade ne’ebé iha hakmatek laran.

Entretantu, José Ramos Horta ofisialmente simu pose nu’udar Prezidente Repúblika (PR) ba períodu 2022-2027, iha kinta ne’e, tuku 23:45 kalan, iha Tasi-tolu.

“Ha’u promete ba ha’u-nia an, iha momentu sira tomak, atu sai Prezidente Repúblika ba timor-oan sira hotu, sein iha dúvida ka subterfújiu sira. Ha’u la reprezenta de’it sira ne’ebé vota ba ha’u, maibé timor-oan sira ne’ebé hamutuk ho ha’u partilla domin ba rai ida-ne’e no ba ita-nia istória eziste iha ha’u-nia hanoin,” Horta hato’o diskursu hafoin simu pose.

Aleinde ne’e, Horta kompromete mós atu defende no kumpre Konstituisaun Repúblika Demokrátika Timor-Leste (RDTL). 

Prezidente Repúblika períodu 2022-2027, José Ramos Horta. Imajen Tatoli/António Daciparu

“Ha’u kompromete atu defende, kumpre no haruka kumpre Konstituisaun hanesan guardiaun permanente no atentu ba lei fundamentál inklui nia valór sira refleta nasaun ne’ebé ita hili atu moris ba,” nia tenik.

Notísia relevante: TR anúnsia Horta sai PR eleitu ba periodu 2022-2027

Aleinde ne’e nu’udar Prezidente Repúblika, Horta atu halo buat hotu bazeia ba prinsípiu salva-guarda valór ne’ebé konsagra iha Konstituisaun, iha protesaun ba liberdade hosi hanoin, fiar, espresaun no pluralizmu ba opiniaun, hodi luta liután ba justisa sosiál, defeza ba valór sira idéntiku ho identidade nasionál, ne’ebé hatuur abut iha eroízmu, no imajináriu-majíku, iha simplisidade, iha hakraik-an, laran-luak, abertura, sentidu inkluzaun no fiar maka’as hosi povu Timor-Leste. 

Iha eleisaun prezidensiál segunda volta iha loron 19 abril 2022, hatudu rezultadu, José Ramos Horta ho votu 397.145 (62,09%) no Francisco Guterres ‘Lú Olo’ ho votu 242.440 (37,91%).

Sentru votasaun estabelesidu iha territóriu tomak 1.200, totál eleitór 859.925, ema ne’ebé tuir vota 646.389, votu válidu 640.967 (99,16%), branku 1.643 (0,25%), nulu 3.734 (0,58%), no rejeitadu 28 (0,00%), abandonadu 15.

Antes ne’e, iha loron 23 janeiru 2022, liuhosi konferénsia nasionál partidu Congresso Nacional de Reconstrução de Timor (CNRT), konfrensista sira deside fó apoiu ba Horta kompete iha eleisaun prezidensiál tinan 2022, maski Horta rasik la’ós kuadru partidu.

Hafoin restaurasaun independénsia, José Ramos Horta eleitu nu’udar Prezidente Repúblika daruak ba períodu 2007-2012.

Notísia relevante: TR anúnsia Horta sai PR eleitu ba periodu 2022-2027

Jornalista : Felicidade Ximenes

Editora     : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here