Prezidente Repúblika, Francisco Guterres "Lú-Olo". Imajen Tatoli/Egas Cristovao

DILI, 19 maiu 2022 (TATOLI)—Prezidente Repúblika, Francisco Guterres Lú Olo, hateten ho Memoriál Palásiu Nobre Lahane Estatu Timor-Leste hatuur ona hodi fó omenájen permanente ba fundadór Estadu ne’ebé hatudu sentidu nasionalista no patriótika aas tebes.

“Ho haksolok mak Prezidente Repúblika simu proposta hosi Centro Nacional Chega, I.P atu harii memorial ida-ne’e iha Palásiu Nobre-Lahane. Ho memorial ida-ne’e, Estadu Timor-Leste hatuur ona, iha fatin istóriku ida-ne’e, omenájen permanente ida ba ita-nia fundadór Estadu ne’ebé hatudu sentidu nasionalista no patriótiku aas tebes iha tempu ne’ebá. Biar hatene iha risku, lakon vida ita-nia maun no bin sira hamriik ho barani no determinasaun atu hatuur Timor-Leste iha mundu, nu’udar país soberanu, livre no independente,” PR Lú Olo hato’o iha nia diskursu bainhira halo inagurasaun ba Memoriál Omenajen ba Prezidente RDTL no Primeiru Governu RDTL iha Palásiu Nobre Lahane, kinta ne’e.

Palásiu Nobre nu’udar edifísiu ho arkitektura karáterístiku hosi tempu koloniál portugés iha tiha ona valór istóriku aas, ninia valor sa’e aas liután tanba iha ne’ebá mak akontese eventu dahuluk relasiona ho hahú prosesu konstrusaun Estadu Timor-Leste.

Centro Nacional Chega (CNC) aprezenta ona konseitu furak ida ba oinsá hakfilak área Palásiu Lahane ba sítiu istóriku.

“Haree ba fatin ida-ne’e nia valór istóriku as tebes ha’u hein katak iha tempu badak entidade relevante Estadu Timor-Leste bele haree oinsá nakfilak tiha área Palásiu Lahane ba sítiu istóriku ida-ne’ebé hamoris memória kona-ba períodu kolonizasaun portugeza no kona-ba eventu hosi 1974 to’o 1999,” nia hateten.

Enkuantu, hein desizaun final, memoriál importante ida-ne’e iha área Palásiu Nobre-Lahane bele tama ona iha roteiru istóriku-kultural-edukativu.
“Ha’u fiar katak sei sai mós referénsia di’ak ida ba estudante sira, ba jerasaun foinsa’e sira no mós ba peskizadó sira, turista hosi rai-laran no rai-li’ur,” nia sujere.

Xefe Estadu ne’e dehan, fatin ne’e iha istória naruk kolonizasaun Protugeza, nune’e ohin halibur iha fatin ida-ne’ebé iha istória naruk no signifikativu tebes. Fatin ida ne’e fó-hanoin istória kolonizasaun portugeza ne’ebé durante tinan 500 lori mai povu Timor-Leste sivilizasaun oin seluk ida, ho elementu simbóliku no kulturál oin seluk liu, inklui lian foun ida, relijiaun foun ida, ábitu alimentar foun, vestuáriu foun, edifísiu ho arkitetura oioin no seluk-seluk tan,” nia hateten.

Foufoun bei’ala sira lasimu no halo revolta iha fatin-fatin, mqibé liuhosi evanjelizasaun no edukasaun misaun katólika sira-nian, administrasaun portugeza konsege hametin sira-nia ukun ho apoiu husi liurai balun no elite timor-oan ne’ebé hetan asesu ba edukasaun no servisu administrasaun no mós ba benefísiu sira seluk.

Ho tempu, sivilizasaun europeia kruza daudaun ho ita-nia uzu no kostume tradisionál ne’ebé la hanesan hosi etnia ida ba etnia seluk.

Ho influénsia hosi lian portugés, dalen Tetun terik nakfilak ba Tetun prasa no sai língua nasionál.

“Neineik-neineik ita-nia sosiedade ne’ebé moris ho regra reinu ida-idak nian, muda mós ho influénsia koloniál portugeza maibé prátika kulturál barak la hadook hosi abut sósiu-kulturál ne’ebé karateriza nu’udar povu timorense,” nia tenik.

PR hateten, ho identidade úniku ne’e mak fundadór sira hahú movimentu organizadu patriótiku no nasionalista iha 1974, bainhira Portugál hahú prosesu deskolonizasaun iha kolónia Portugeza sira hafoin revolusaun ai-funan akontese iha 25 abril 1974.

Prosesu deskolonizasaun interrompe bainhira golpe no funu sivíl akontese iha Timor-Leste iha 11 Agostu 1975, pás no estabilidade restaura iha finál agostu 1975, enkuantu hein Governu Portugés fila mai atu kontinua deskolonizasaun, FRETILIN kaer administrasaun de faktu ba Timor-Leste hosi agostu to’o fulan novembru 1975.

Entretantu, infiltrasaun militár indonézia mós akontese beibeik iha fronteira rai, Balibo monu iha inimigu nia liman iha 16 outubru 1975. Iha kontestu funu hahú ona no invazaun no okupasaun Timor-Leste sei akontese duni mak komite sentrál FRETILIN deside proklama indepedensia Timor-Leste nian iha 28 novembru 1975.

Prezidente FRETILIN, Francisco Xavier do Amaral, mak nu’udar Prezidente FRETILIN mak lee testu proklamasaun indepedénsia Timor-Leste iha 28 novembru 1975.

“Iha 20 maiu 2002 loron restaurasaun independénsia Timor-Leste nu’udar Prezidente Parlamentu Nasionál, ha’u simu previléjiu no onra lee fali textu proklamasaun ne’e. Lia fuan sira-ne’e hotu tama iha memoriál ida-ne’e atu fó omenajen ba señor Francisco Xavier do Amaral nu’udar Proklamador no Prezidente RDTL no mós ba Primeiru Governu RDTL, ho Nicolau dos Reis Lobato, nu’udar Primeiru-Ministru ho ninia Gabinete kompostu ho ministru 11 no vise-ministru hitu,” nia dehan.

Iha fatin ida ne’e, iha 30 novembru 1975 mak akontese reuniaun dahuluk primeiru Governu Timor-Leste hafoin proklamasaun independénsia nasionál Timor-Leste.

Iha gravasaun ne’ebé sentru Chega, I.P rekupera ona no bele rona oinsá aman fundadór sira hahú harii Estadu Timor-Leste. Bele rona diskursu hosi Prezidente Repúblika, iha tempu ne’ebá, señor Francisco Xavier do Amaral no mós husi Primeiru-Ministru RTDL, Nicolau dos Reis Lobato.

“Eventu sira-ne’e hotu halo parte ita-nia prosesu ukun rasik-an ne’ebé asume hosi komite sentrál FRETILIN, iha tempu ne’ebá hafoin halo administrasaun de-faktu no komprova duni ba komunidade internasional katak timor-oan mós hatene organiza-an no kaer ukun rasik-an ho kbiit,” nia dehan.

Jornalista : Nelson de Sousa

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here