Prezidente Repúlika períodu 2022-2027 emposadu, José Ramos Horta no Prezidente Repúblika sesante, Francisco Guterres ‘Lú Olo’ komprimenta malu, iha serimónia investidura iha Tasi-tolu, kinta (19/05). Imajen Tatoli/António Daciparu

DILI, 19 maiu 2022 (TATOLI)—Prezidente Repúblika (PR) sesante, Francisco Guterres ‘Lú Olo’, husu PR emposadu ba períodu 2022-2027, José Ramos Horta, durante mandatu tenke asegura solidaridade institusionál.

“Xefe Estadu tenke asegura solidaridade institusionál no interdependénsia funsaun entre órgaun soberania, iha kuadru separasaun poder, tau-matan ba konsolidasaun paz, estabilidade no unidade nasionál, luta ba progresu ekonomia no ekilidade oportunidade no planu atividade ekonómika no sosiál, inklui presiza forma estratéjika hodu projeta Timor-Leste iha nível internasionál,” Lú Olo hato’o diskursu iha serimónia investidura Prezidente Repúblika, Horta, iha Tasi-tolu, kinta ne’e.

Notísia relevante: Ramos Horta kompromete sai Prezidente Repúblika ba povu tomak

Lú olo parabeniza Horta tanba hetan votu maioria hosi povu timor-oan, hodi asume knaar hanesan Xefe Estadu tuir Konstituisaun haruka.

“Dezeja Prezidente Repúblika foun hetan susesu durante asume funsaun a’as liu iha Estadu Timor-Leste. Ezersísiu ne’e sei fó benefísiu boot ba  independénsia no soberania nasionál, unidade Estadu inklui funsionamentu instituisaun demokrátika, hanesan estabilidade polítika no institusionál inklui planu nasionál no hadi’a kondisaun ba vida no bem-estar sidadaun,” Prezidente sesante hateten.

 Aleinde ne’e, PR sesante hameno ba Horta, hodi envolve partisipasaun sidadaun iha prosesu polítiku tomak inklui dezenvolvimentu ekonómiku sosiál no kulturál ne’ebé presiza sempre atu promove no asegura ninia kontinuidade.

“Ita-nia progresu dezenvolvimentu presiza mai ho ekonomia sustentável, diversikada no bele kontribui reseita, ne’ebé Estadu presiza atu promove edukasaun saúde, abitasaun sosiál, fasilidade públika ba benefísiu povu. Halo mós aplikasaun ba investimentu produtivu Fundu Petrolíferu, liuhosi Orsamentu Jerál Estadu, tuir prinsípiu unidade transparénsia orsamentál ne’ebé krítiku, nune’e jerasaun agora no tuir mai bele hetan benefísiu hosi rekursu naturál ne’ebé Timor-Leste iha,” nia akresenta.

Lú Olo fó hanoin, violénsia doméstika no diskriminasaun hasoru feto no labarik sira hanesan aktu ne’ebé labele fó toleránsia, hanesan frajilidade ba ema ne’ebé moris iha situasaun vulnerabel iha país. Nune’e mós, ba ema portadór defisiénsia fízika ne’ebé presiza hetan atensaun espesiál hosi Estadu no plenu respeitu ba sira-nia direitu hanesan sidadaun ida.

Aleinde setór ekonomia, sosiál no kulturál, PR sesante bolu atensaun PR eleitu atu tau-matan nafatin ba setór justisa.

“Kestaun ne’e fundamentál atu rezolve disputa no konflitu iha sosiedade nia-le’et no hanesan rezolusaun di’ak ba lei no norma kulturál ne’ebé la apár ho Konstituisaun no lei ne’ebé vigór, ne’ebé kontribui ba paz, sosiál no seguransa jurídika ba sidadaun jerál inklui ajente ekonómiku,” Lú Olo fó hanoin.

Francisco Guterres refere ba knaar Xefe Estadu nu’udar Komandante Supremu Forsa Armada, ne’ebé komportu hosi FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL), ne’ebé iha dezafiu partikulár atu hasa’e kapasidade hodi halo kontrola fronteira rai-maran no tasi, inklui kombate no redús kriminalidade grave no organizada.

“Partisipasaun Forsa Armada iha misaun paz no kontensaun ne’ebé mosu hanesan dimensaun ho interese espesiál, iha ámbitu konsolidasaun no mordenizasaun Forsa Armada,” nia tenik.

Lú Olo husu ba Xefe Estadu atu efetivamente promove molarizasaun sistema polítiku, kombate korrupsaun, abuzu poder, klientelizmu no nepotizmu.

“Prezidente Repúblika tenke halo diálogu atu buka konsensu alargadu ne’ebé konstrui konvejénsia no promove sosiedade demokrátika, unidu, estável, dezenvolvidu, no solidáriu, ne’ebé hanesan Timor-Leste nia mehi,” nia dehan.

Nune’e, Francisco Guterres, husu ba entidade hotu atu kolabora ho Horta hodi dezempeña misaun nu’udar Xefe Estadu. 

“Hau nia apelu ba entidadehotu atu kolabora ho José Ramos Horta, atubele hala’o no dezempeñ nia misaun hanesan Xefe Estadu Timor-Leste,” Lú Olo apela.

Lider nasionál ne’e subliña, presiza hanoin tipu foun governasaun no esforsu hosi instituisaun hotu ne’ebé permite fó-an ba Objetivu Dezenvolvimentu Sustentável ba ajenda globál tinan 2030.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here