Jenerál Reformadu, Tito da Costa Cristóvão ‘Lere Anan Timur. Imajen Tatoli/Tomé Amado.

DILI, 19 maiu 2022 (TATOLI)—Jenerál Tito da Costa Cristóvão ‘Lere Anan Timur’ Reformadu, kinta ne’e, sai oradór iha semináriu iha ámbitu komemorasaun restaurasaun independénsia ba da-XX, ne’ebé iha biban ne’e, nia husu jerasaun foun atu tane a’as patriotizmu no nasionalizmu nu’udar timor-oan.

“Ha’u husu ba imi joven sira, atu tane a’as nafatin imi-nia patriotizmu no nasionalizmu hodi haree ba komemorasaun tinan-20 restaurasaun independénsia ne’e hodi sai buras nafatin. Ha’u husu ba imi joven sira atu hadomi imi-nia rain, hadomi imi-nia povu no hadomi imi-nia an,” Lere hateten iha salaun Katedrál, Vila Verde, kinta ne’e.

Notísia relevante: Lere agradese ba povu TL ne’ebé apoiu nia kandidatura

Nia dehan, nu’udar eis Jenerál ne’ebé agora envolve-an iha vida polítika no mai hosi partidu Frente Revolucionária do Timor-Leste Independente (FRETILIN), labele haree de’it ba partidu, maibé tenke haree ba timor-oan hotu.

“Ha’u sempre preokupa ba futuru povu no nasaun. Joven mak futuru nasaun, tanba ne’e nasaun Timór bainhira iha problema bele konsidera ne’e fatór internu, maibé Timór atu sai di’ak ka a’at, atu funu hasoru malu ka lae, desizaun iha timor-oan nia liman, sira mak sei determina, la’ós ema seluk,” nia akresenta.

Tuir Lere, ukun-an ne’e laós milagre ka prezente ne’ebé simu hosi ema seluk, maibé ho sakrifísiu boot, fakar ran no ruin naklekar mak hetan rezultadu independénsia, tanba ne’e joven sira tenke valoriza.

“Imi tenke sakrifika imi-nia an atu sai ema matenek. Imi tenke sakrifika-an ba família no nasaun doben. Bainhira imi hanesan eskola-na’in karik tenke esforsu-an atu sai ema matenek hodi prepara-an ba futuru. Laiha transporte imi bele halo sakrifísiu la’o ain ba eskola tanba imi mak jerasaun foun ba rai doben ida-ne’e,” nia tenik.

Eis Jenerál Reformadu ne’e dehan, maski ho idade avansadu, maibé nia sei nafatin iha vontade hakarak kontribui ba Estadu.

“Naran katak sei moris iha mundu ne’e atubele prepara nafatin jerasaun foun sira hodi hatene liután sira-nia devér no morál nu’udar joven ida iha nasaun ne’e.  Ha’u-nia sakrifísiu hodi serve Estadu ne’e iha ona tinan-40 resin nia-laran no daudaun tempu to’o ona mai ha’u atu deskansa, maibé enkuantu ha’u sei moris no sei bele, ha’u hakarak nafatin fó kontribuisaun ba Estadu liuhosi prepara joven sira atu hatene hadomi nia-nia rain no povu nia futuru,” Lere salienta.

Nia konsidera, futuru Timór iha jerasaun foun nia liman, ne’ebé nasaun atu sai di’ak ka a’at depende ba jerasaun foun.

“Jerasaun antigu ne’ebé idade avansadu ona to’o agora prontu kontribui ba rai ida-ne’e, maibé la másimu ona, tanba ne’e ha’u hakarak kontribui nafatin ba rain ida-ne’e no ba jerasaun foun sira nia di’ak,” nia afirma.

Líder nasionál tenke prepara jerasaun foun

Iha sorin seluk, Lere husu líder nasionál hanesan Xanana Gusmão, José Ramos Horta, Taur Matan Ruak, Marí Alkatiri no seluk tan atu prepara futuru di’ak ba jerasaun foun sira.

“Tinan-lima ne’e nu’udar tinan krusiál tebes, tanba ita komemora tinan-20 restaurasaun independénsia Timor-Leste nian. Ha’u husu ba líder hotu atu fó atensaun másimu ba tinan ne’e hodi halo buat ruma di’ak ba ita-nia jerasaun foun sira atu prepara futuru di’ak ba sira,” nia hameno.

Tuir eis Jenerál Reformadu, líder nasionál sira iha esperiénsia boot ba rai-nia destinu tanba iha vizaun no misaun ida atu lori nasaun ba ukun rasik-an no rezultadu hatudu líder sira-ne’e konsege halo ona buat barak, maski balun konsege atinje ona no balun sei iha prosesu.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here