Koordenador animasaun 19-20, Quito Belo. Imajen/Espesiál.

DILI, 19 maiu 2022 (TATOLI)—Koordenadór Animasaun 19-20 Maiu, Quito Belo, informa grupu banda múzika ualu (8) sei anima komunidade iha selebrasaun 20 maiu no serimónia investidura ba Prezidente Repúblika eleiitu períodu 2022-2027, José Ramos Horta, ne’ebé sei hala’o iha Tasi-Tolu, Dili.

“Ita iha grupu banda múzika ualu (8), sira sei kanta iha loron 19 hahú hosi 16h30 lorokraik to’o toma pose ramata. Depois kontinua fali to’o 11h00 kalan ne’e to’o fali tuku 02h00 dadeersa,” Quito Belo hateten ba Agência Tatoli, iha Tasi Tolu, Dili, kinta ne’e.

Grupu banda múzika ualu (8) ne’ebé halo animasaun ne’e mak grupu Precios Band, Fitun Furak, 5 do Oriente, Ramkabian, Salurik, Ovid-16, El Chapo no Lahane Group. Múzika ne’ebé sira sei aprezenta nia tema mak múzika kona-ba dame no múzika ne’ebé tuir duni situasaun ohin loron nian.

“Ha’u dezáfia sira atu lori múzika Timor de’it, atu ita prómove ita-nia múzika Timor ba rai seluk. Katak, ita mós iha kualidade múzika Timor ne’ebé forte, tanba ne’e ha’u dehan ba banda sira katak mai iha ne’e ita anima ita-nia ema Timor. Ita la’ós mai anima ema malae, ne’ebé mai ita lori de’it ita-nia múzika ho ita-nian rasik,” nia dehan.

Alende, grupu banda múzika ualu ne’e iha mós artista junior no seniór sei anima komunidade hanesan Maria Vitória (MARVI), Tonny Pereira, Lola Cancio, Nouraly, iha mós artista balun ne’ebé nomeia hosi Prezidente eleitu, José Ramos Horta.

“Ami seida’uk simu sekuénsia naran ami seida’uk hatene, maibé ida-ne’e konfirmadu ona atu sira mai halo aprezentasaun,” nia dehan.

Tanba iha sekuénsia programa ne’ebé parte animasaun simu katak, atividade konsertu múzikál ne’e hahú hosi 19 iha 16h30 to’o 19h30. Depois 19h30 sei iha dansa kolosál hosi grupu Leziavál sira sei aprezenta, depois tama ba toma pose, depois konsertu múzikal jerál.

“Sira-nia múzika ne’e ami ta’is ona atu múzika ne’e ko’alia kona-ba dame, la ko’alia kona-ba konflitu ba interese ema ida-nian. Maibé ko’alia kona-ba dame no oinsá dezenvolve ita-nia múzika ba rai-li’ur nomós ba ita-nia dezenvolvimentu ne’ebé agora daudaun la’o iha ita-nia rai-laran. Maibé, Maria Vitória (Marvi) orsida nia sei kanta múzika tolu ka haat, inklui múzika rezisténsia balun maibé múzika rua seluk nia la hateten,” Koordenadór animasaun ne’e hateten.

Aleinde ne’e, sei aprezenta grupu koremetan hanesan grupu Smith Lahane sira mós sei halo animasaun tanba grupu ne’e hanesan grupu kultura.

“Entaun, ita konsidera sira tenke mai, atu nune’e sira mai hananu múzika kultura ne’ebé nia baze hanesan tetun,” nia dehan.

Hosi grupu banda múzika no artista sira, iha mós grupu defisiensia, sira sei toka iha abertura, ne’ebé sira sei lori múzika rua maibé la hatene sira-nia múzika nia titlu ne’e saida.

“Sira-nia preparasaun sira hein de’it, tanba horisehik sira gladi, ne’ebé daudaun ne’e sira prontu ona atu halo animasaun,” nia dehan.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan