Rezultadu perfurasaun bee-moos iha área Caisido, suku Tirilolo, postu administrativu Baucau vila, kinta (19/05). Imajen Tatoli/Natalino Belo.

BAUCAU, 19 maiu 2022 (TATOLI) – Governu Austrália liuhosi kompañia H2O apoia halo perfurasaun bee-moos iha área Caisido, suku Tirilolo, postu administrativu Baucau vila, munisípiu Baucau.

Xefe suku Tirilolo, Ricardo Ernesto Belo, hateten, prosesu perfurasaun bee-mos hahú faze dahuluk iha fulan-novembru 2021, bainhira ekipa tékniku sira halo identifikasaun fatin, kontinua halo serimónia kulturál tuir lisan Caisido no ikus halo perfurasaun.

Xefi suku Tirilolo, Ricardo Ernesto Belo. Imajen Tatoli/Natalino Belo.

Nune’e autoridade suku agradese ba Governu Austrália ne’ebé ajuda rezolve problema bázika komunidade área Caisido ne’ebé durante ne’e halerik ba bee-moos.

“Atu hadi’a infraestrutura no kanalizasaun depende ba parte Governu Austrália, sé lae buka dalan ba governu liuhosi Bee Timor-Leste (BTL),” Xefe suku Tirilolo hateten iha Caisido, kinta ne’e.

Xefe suku sei koordena ho parte kompañia ne’ebé responsável ba perfurasaun atu instala kanu-boot nune’e bee-nia volume boot nune’e sufisiente ba komunidade atu utiliza.

Prosesu kanalizasaun depende ba bee-nia forsa, bainhira sufiense bele kanaliza ba kada uma-kain maibé natoon sei kanaliza ba kada aldeia atu komunidade sira uza hamutuk.

“Ha’u sei koordena ho parte kompañia atu buka solusaun,” Ricardo akresenta.

Asistente Perfurasaun Bee-Moos hosi Kompañia H20, Fernando de Jesus, esplika, distánsia perfurasaun to’o hetan bee metru 79,4 maibé perfurasaun to’o metru 81 kondisaun rai, enkuantu bee nia aas metru 57,31 no volume bee fó-sai litru lima por second.

Asistente perfurasaun hosi kompañia H2O, Fernando de Jesus. Imajen Tatoli/Natalino Belo.

Perfurasaun bee-moos iha área Caisido programa hosi militár forsa Austrália ne’ebé fahe ba faze datoluk hanesan identifika bee iha fulan-novembru, perfurasaun no ikus mak halo instalasaun.

“Kualidade bee bele uza ba hemu, maibé seidauk hatene, ami mak atu halo instalasaun ka kompañia seluk mak kontinua,” Fernando hateten.

Komunidade iha área Caisido, suku Tirilolo hamutuk aldeia haat kompostu hosi aldeia Lialailesu, Ossoua, Parlamentu no Caisido hamutuk uma-kain 400 ho totál populasaun rihun rua resin.

Jornalista    : Natalino Belo

Editór           : Evaristo Soares Matins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here