DILI, 19 maiu 2022 (TATOLI)–Timor-Leste restaura nia independénsia durante tinan 20 ona, maibé setór ekonómiku depende barak liu ba produtu importadu, tanba Estadu seidauk iha indústria boot hodi kontribui no hasa’e ekonomia rai-laran.

Atu hatene pontu situasaun sira, jornalista Tatoli halo entrevista eskluziva ho Deputada Bankada Partidu Frente Mudansa (FM), Isabel Ximenes, iha Parlamentu Nasionál.

Hanesan partidu polítiku ne’ebé mak hetan asentu parlamentár, FM nia kontribuisaun saida ba prosesu konstrusaun Estadu durante tinan 20?

Partidu Frente Mudansa eziste iha 2012 liuhosi kongresu dahuluk. Partidu ne’e nia partisipasaun iha Governu ou kontribuisaun ba Estadu durante tinan 10. FM mós paritisipa iha eleisaun parlamentár no konsege hetan kadeira iha órgaun lejislativa. Lidér partidu mós partisipa iha Ezekutivu no kontribui direta ba prosesu dezenvolvimentu nasaun nian mak Vise-Ministru Komérsiu Indústria, Abel Ximenes, iha partidu laran nia hanesan Sekretáriu-Jerál  organizasaun partidária.

Abel Ximenes uluk fundadór ba kooperativa iha Timor-Leste, ho objetivu luta hasai povu hosi kiak no mukit, fó benefísiu ba povu, Estadu bele hamriik mesak, lori nia kuda talin.

Mandatu, Sr Abel Ximens bele hatudu liuhosi progresu ida ne’ebé mak reativa fila fali koperativa kuaze iha timor-laran tomak no dezenvolve mós programa barak ne’ebé mak liga ba área dezenvolvimentu rural sira, óinsa  mak hasa’e setór ekonomia, liuhosi koperativa nian.

Mandatu VI Governu, partidu Frente Mudansa kontinua partisipa iha governasaun, liuhosi Ministériu Edukasaun, Juventude no Desportu (MEJD), ne’ebé mak elementu hosi FM kontinua fó kontribuisaun liuhosi área edukasaun nian iha progresu barak, ida mak harii Institutu Politékniku Betanu (IPB), no kontribui hadia ensinu vokasionál barak ne´ebé durante ne´e eziste.

Tinan 20, Timor-Leste restaura nia independénsia, FM nia haree setór ekonomia la’o oinsá?

FM nia haree, durante tinan 20 restaura independénsia, setór ekonomia sei fraka, tanba Timor-Leste sei depende barak ba importasaun hosi liur. Setór ekonomia la’o de’it iha merkadu tradisionál, hosi ne’e mós ita simu produtu barak hosi liur. Sistema ekonomia moris ho de’it faan sasan liuhosi nesesidade bázika, maibé ita seidauk iha indústria ida ne’ebé bele hamoris povu.

Nune’e mós iha mikro empreza ne’ebé mak timoroan sira kontribui liuhosi atividade ki’ik oan sira hanesan halo dosi, kripik, mina-nuu ne’ebé faan iha supermerkadu. Buat sira ne’e hotu hanesan kritéria, indústria kiik, ne’ebé fó mós kontribuisaun ba ekonomia Timor-Leste nian, karik ne’e la’os bo’ot liu, maibé di’akliu iha futuru Governu komesa halo investimentu bo’ot hodi bele kria indústria, no husi ne’e mak nasaun labele dependente ba rai-liur. Enkuantu Timor-Leste bele sai mós esportadór ka produtu lori fali ba liur, nune’e bele rezulta hodi hasa’e ekonomia rai-laran.

Saida maka ita atinje ona no seidauk iha setór ekonomia, durante tinan 20?

Timor-Leste seidauk atinje buat barak, nasaun ne’ebé sei foun, seidauk halai makaas hodi tuir nasaun boot sira. Signifika, Timor-Leste sei falta buat barak hanesan indústria atu bele dezenvolve ekonomia rai-laran, seidauk iha diversifikasaun ekonómika liuhosi rikeza naturál hanesan petróleum, turizmu, agrikultura no seluk tan.

Tuir FM nia haree, Timor-Leste kontinua depende ba produtu importasaun, saida mak Estadu nesesita hodi halo investimentu iha área produtiva hanesan agrikultur no agro-indústria?

Loloos Governu prioritiza uluk investimentu setór sosiál ne’ebé mak hadia setór saúde, edukasaun, kooperativa, hadia infraestrutura, hirak ne´e mak bele fó benefísiu direta ba rai ida ne’e.

Ba futuru Timor-Leste presiza investe barak iha agrikultura nuudar timoroan nia identidade, nune’e mós setór peska hodi fó benefísiu barak ba ita, entaun nesesidade ba Governu oinsá mak investe hodi fó subsídiu, ajuda ita nia agrikultura sira hodi bele haforsa atividade fila rai ho modernu.

Floresta, presiza reflorestasaun tanba estragu sira ai-horis ka ai-laran tuan, tanba Timor-Leste kategoria taa maka’as iha mundu. Ida ne´e dezáfiu boot ba Estadu, ba Governu oinsá bele kuda fila-fali ai-horis sira ne’ebé kriatura estraga.

Orsamentu Jerál Estadu 2022 ho montante bilaun $1.675, Governu aloka 27%, maibé produsaun rai-laran sei kontinua menus, óinsa ho FM nia haree ba ida ne’e?

Produsaun rai laran sempre menus hela de’it, ne’e dezáfiu tanba nasaun seidauk iha investimento iha área ekonomia liuliu hanusa mak bele investe iha agrikultura, investe iha ita nia emprezas lokál alias mikro empresa sira. Se agora Governu hanoin ne’ebé di’ak hodi investe atu bele bele haburas negósiu, ida ne’e mak bele sai hanesan fatór ida ne’ebé mak ajuda Governu hodi bele dezenvolve ekonomia.

Vantajen no impaktu saida mak Timor-Leste sei hasoru, bainhira kontinua depende importasaun dúke produsaun?

Timor-Leste nia osan sai hotu ba liur, indikadór boot liu mak halo dezenvolvimentu iha ema nia rain, karik timoroan hakarak investe iha nia rai-rasik, konserteza osan sirkula iha rai-laran.

Se ita nia hakarak dezenvolve ita nia rai, osan tenke sirkula barak mai ita nia rai, entaun ida ne’e sei sai nafatin dezafiu iha futuru, katak osan ne’ebe mak ita iha rai laran prodús liuhosi ita-nia atividade, rendimentu ita hetan, ezemplu: saláriu sei la fó han ita iha rai-laran, se la sirkula no osan ne’e sei sai barak liu iha liur.

Maibé iha mós vantajen, mas la barak tanba hadia de’it lakuna sira. Tanba ne’e Governu la presiza fera ulun hodi harii setór indústria boot hodi hamenus importasaun, apezar durante ne’e nasaun iha kooperasaun ho rai sira seluk maibé vantajen kiik no dezvanjaten mak boot liu.

Tuir FM  nia haree, presiza investimentu ida oinsá, atu Nasaun labele depende ba produtu ai-han ka nessesidade bázika?

Timor-Leste presiza iha produsaun hanesan mina, ida ne’e esensiál tebes, Bankada Frente Mundansa no apoiu hosi UDT ho PD tenta hatama proposta ida atu Governu prevee osan barak ba setór agrikultura hanesan kafé hodi dezenvolve indústria kafé no mina hodi prodús kualidade produtu atu bele fó benefísiu ba sosiedade iha rai-laran.

Nesesidade bo’ot liu mak hanusa ita rezolve folin mina sa’e, ita hatene impaktu husi funu entre Rusia ho Ukraina nian, sei lahotu iha loron ida ka rua, impaktu ne’e naruk ba oin, entaun ami nia proposta altura ne’e, hanusa tau osan bo’ot uitoan ba iha ne’eba, hodi dezenvolve ita nia indústri mina, komesa fó subsídiu ba produtór mina, fó subsídiu ba agrikultór sira, nuu sira hodi komesa kuda fali nuu foun para bele dezenvolve.

Ita nian rai ne’e fertile (buras), ita nia rai ne’e apropriadu tebes ba ita atu kuda nuu no bele prodús mina ida ne’ebé ho kualidade aas tebes, atende ita nia nesesidade rai-laran, maibe bele mós sai hanesan produtu ida hodi bele esporta fali iha rai-liur.

Modelu dezenvolvimentu ekonómiku saida maka parte FM iha ba Timor-Leste agora no futuru?

Setór ekonomia importante atu hadia, ida ne’e hakarak ka lakohi, saúde. Saúde sai mós fatór ida ne’ebé mak fó kontribuisaun hodi hadia dezenvolvimentu. Aleinde ne’e mós tenke rezolve nutrisaun la-di’ak, ida ne’e pontu importante atu sai traballu uma-nian hodi ba oin nesesita duni atu hadia.

Mensajen saida mak FM hato’o ba Governu, nune’e bele hadia setór ekonomia iha rai-laran?

Tenke investe iha mikro empreza sira, FM enkoraza nafatin emprezáriu lokál sira, nasionál atu iha korajen hodi investe iha ita nia rai, nune’e hamenus ita nia dependénsia ba rai-liur. Husu mós ba Governu katak tenke fó kontribuisaun ida ne’ebé bo’ot ba setór privadu, atu bele la’o ba oin, tanba setór privadu mesak labele.

Jornalista   : Mirandolina Barros Soares

Editór         : Zezito Silva

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here