Ministru ba Gabinete Primeiru-Ministru no Segundu Ministru Estrajeiru no edukasaun Singapura, Mohd Osman, akompaña hosi Embaixadora Timor-Leste ba Singapura, Ângela Carrascalão, hasoru malu ho Prezidente Repúblika eleitu, José Ramos Horta, iha eskritóriu Gabinete Nobel Paz, Farol, kuarta (18/05). Imajen Tatoli/Filomeno Martins

DILI, 18 maiu 2022 (TATOLI)–Ministru ba Gabinete Primeiru-Ministru no Segundu Ministru Estrajeiru no Edukasaun Singapura, Mohd Osman, kuarta ne’e, hasoru Prezidente Repúblika (PR) períodu 2022-2027 eleitu, José Ramos Horta.

“Ami apoia Timor-Leste ninia aplikasaun ba membru Asosiasaun Nsaun Sudeste Aziátiku (ASEAN, sigla inglés) no ami sei kontinua apoia Timor-Leste iha parte tékniku no hasa’e kapasidade Timor-Leste atu sai membru ASEAN iha tempu oin-mai,” Mohd Osman hateten hafoin hasoru Prezidente Repúblika eleitu iha eskritóriu Gabinete Nobel Paz, Farol.

Notísia relevante: Diplomata membru ASEAN kongratula Ramos Horta

Biban ne’e, nia haksolok tanba bele hasoru malu ho Horta no komprometidu kontinua hametin relasaun bilaterál.

“Singapura no Timor-Leste iha relasaun sólidu tebes. Ha’u ho Prezidente Ramos Horta ko’alia kona-ba relasaun bilaterál ne’ebé sólidu entre país rua inklui ko’alia oinsá lori relasaun ne’e ba oin,” Ministru ba Gabinete Primeiru-Ministru akresenta.

Nune’e mós, parte rua ko’alia mós kona-ba kooperasaun téknika hodi apoia Timor-Leste ninia dezenvolvimentu ba oin.

“Ami kontente mai iha ne’e atu hola parte iha eventu istóriku hanesan serimónia pose Prezidente José Ramos Horta, no mós partisipa iha selebrasaun restaurasaun independénsia ba da-XX. Ba oin, ami sei serbisu hamutuk ho Prezidente Horta hafoin nia komesa mandatu iha tempu besik,’ nia tenik.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here