SEKOMS liuhosi Sekretáriu Jéral Komisaun Nasional Eventu 20 de Maiu, Manuel S. Tilman, entrega kartaun VIP ba Najwa Sihab. Imajen Tatoli/Cidalia Fátima.

DILI, 18 maiu 2022 (TATOLI)—Sekretariadu Estadu ba Komunikasaun Sosiál (SEKOMS) fasilita kartaun VIP (Verry Important Person) ba ekipa Narasi TV ne’ebé lidera husi Najwa Shihab hodi partisipa iha selebrasaun tinan 20 restasauran independensia Timor-Leste (TL) ba dala-XX.

Iha oportundiade ne’e, SEKOMS mos oferese Jantar hamutuk ho Ekipa Narasi TV ne’ebé partisipa hosi reprezentante media nasional sira hanesan Timor Post, VIP TV, Hatutan, Oé-Cusse Post, Naunil, Neon Metin no Agência Tatoli, I.P.

Sekretariu Estadu Komunikasaun Sosial, Mericio Juvinal ‘Akara’ esplika, antes ne’e ekipa Narasi TV hato’o ona karta ofisiál ba SEKOMS ne’ebé liga ho komunikasaun, fahe esperiénsia hodi bele fó apoiu ba prosesu kobertura iha eventu importante tinan 20 Timor-Leste nian.

“Ha’u hetan karta hosi Najwa ho nia ekipa direta mai SEKOMS, antes sira mai husu para bele fasilita. Ami responde karta ida-ne’e, karta seluk ami la simu, ami hanoin katak buat hotu la’o di’ak tanba karta ofisiál ami simu mak hosi Mba Nana ho ekipa,” Mericio Juvinal ‘Akara’ hateten hafoin oferese jantar hamutuk ho ekipa Narasi TV, iha Timor Plaza, tersa ne’e.

Governante ne’e akresenta, Governu konsidera Mídia Internasionál seluk hanesan no laiha diskriminasaun, SEKOMS sei halo tratamentu hanesan maibé depende ba pedidu hosi mídia ne’e rasik bainhira hasoru difikuldade ruma durante iha terrenu inklui fasilita kartaun VIP.

“Bele sei iha preokupasaun ruma ita nakloke ba ida-ne’e, tanba dalaruma ein jerál laiha problema no balun sente katak presiza iha apoia ka karta direta, entaun ita heree tuir ida-ne’e.Maibé, se iha Joarnalista ruma sente iha difikuldade no obstakulu balun, ita prontu iha terrenu atu halo back up apoia no fasilita sira halo kobertura di’ak, SEKOMS prontu apoiu mídia hotu,” nia hateten.

Mericio Juvinal ‘Akara’ hateten, jantar hamutuk ne’ebé oferese ba ekipa Narasi TV hanesan meiu ida hodi bele hametin lasu amizade hanesan parseiru iha setór komunikasau no to’o agora seidauk hetan informasaun relasiona no mídia internasionál seluk nia partisipasaun iha eventu importante ne’e.

“Ne’e hanesan sharing informál, maibé ita la taka dalan ba mídia sira seluk. Ha’u mos seidauk hatene mídia (Internasional) ne’ebé mai, ne’e hanesan mais internál no ida-ne’e limitadu, ita la’ós halo serimónia meet the press,” nia dehan.

Responsavel Narasi TV, Najwa Shihab agradese ba atendimentu ne’ebé oferese hosi Governu inklui ema Timor sira-nia amizade ne’ebé di’ak tebes hosi simu ekipa nia prezensa pela primeira vez iha Timor-Leste.

“Ekipa ida-ne’e hakarak halo kobertura ba Timor-Leste nia aniversáriu ba tinan 20 no ha’u sente ami bele aprende hosi nasaun joven ida-ne’e, oinsá bele desenvolve nia an hafoin liuhosi tempu funu ne’ebé naruk,” Najwa Shihab hateten.

Sekretariu Jéral Komisaun Nasional Eventu 20 de Maiu, Manuel S. Tilman, esplika SEKOMS rasik mak hato’o pedidu ba komisaun hodi oferese kartaun VIP hamutuk ualu (8) ba ekipa Narasi TV ne’ebé lidera hosi Najwa Shihab.

“Hanesan Sekreatriu Jéral ba komisaun ida-ne’e, ha’u mós iha hanoin atu fó diretamente hodi husu sira-nia partisipa iha ita-nia eventu ida-ne’ebé mais istória ba nasaun Timor-Leste, hodi prepara VIP ba equipa tomak,” Manuel S. Tilman hateten.

Nia dehan, mídia internasionál seluk bele hetan kartaun hanesan maibé tenke bazea ba pedidu ne’ebé iha no komisaun hare’e ba perfil ema-ne’ebé mais importante hodi hetan fatin, no antes ne’e Komisaun mós fasilita ona kartaun VIP ba ekipa mídia huoi Portugál.

Prezidente Konsellu Imprensa, Virgilio Guterres konsidera asistensia VIP ne’ebé oferese ba ekipa Narasi TV la konsidera hanesan diskriminasaun tanbá haree ba perfil hosi Najwa Shihab nin ne’ebé koñesidu iha komunidade politika Indonezia.

Tratamentu privilieiju ne’ebé simu la’ós buat boot ida maibé importante liu mak oinsá mídia internasionál seluk bele hetan asesu hanesan RTP, Antara News, NHK Japaun no seluk tán.

Jornalista : Cidalia Fátima

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here