Edifísiu UNPAZ iha Ai-mutin. Imajen Tatoli/Egas Cristóvão

DILI, 18 maiu 2022 (TATOLI)—Reitór Universidade da Paz (UNPAZ), Adolmando Amaral, husu parte hotu halo koordenasaun di’ak ho Ministériu Ensinu Superiór Siénsia no Kultura (MESSK) ne’ebé prevee $168.000 hodi fó servisu liña internet ba Instituisaun Ensinu Superiór Públiku no Privadu (IESPP) hamutuk 16, nune’e bele asesu internet ho di’ak.

“Ha’u hanoin ita hariku operadór sira de’it. Tanba Instituisaun dosente no estudante sira la aproveita ho di’ak. Ha’u haree ita tau osan atu hadi’a de’it jestaun operadór sira maibé ita la aproveita ho másimu tanba operadór tolu ne’e sira ninia fornesimentu liña internet mós la’o hakdasak loos,” Reitór UNPAZ, Adolmando Amaral, hateten ba Agência Tatoli, iha kampus UNPAZ, kuarta ne’e.

Notísia relevante: Eskola 1.008 sei hetan servisu asesu internet hosi Governu

Reitór ne’e sujere, di’ak liu MESSK haree nesesidade seluk ne’ebé nesesáriu liu ba ema hotu ne’ebé urjente liu.

“Daudaun prosesu ensinu aprendizajen aula prezensiál la’o normál hela, uluk ministériu oferese internet ho intensaun ida atu apoiu ensinu aprendizajen online, maibé agora offline ona ne’ebé atu labele gasta osan, di’ak liu ministériu laiha ona programa bele fó fali osan ne’e ba ministériu sira seluk,” nia akresenta.

Orsamentu ne’ebé prevee ba liña internet, sei fornese ho velosidade 5mb ba kada IESPP.

“Agora UNPAZ uza 6mb de’it mós hakdasak ona, satán 5mb atu halo tan saida. Iha situasaun COVID-19 Governu fornese ona apoiu subsídiu liña internet ho velosidade boot hodi fasilita IESP sira, ne’e nafatin de’it agora ho velosidade kiik ne’e atu halo saida loos,” nia akresenta.

Iha sorin seluk Reitór Instituto of Bussiness (IOB), Pedro Ximenes, agradese ba esforsu ne’ebé ministériu halo ba IESPP sira, maibé nia mós husu programa hanesan ne’e di’ak liu tenke iha mós koordenasaun hosi liña ministeriál atu fasilita di’ak liután estudante.

Tuir Reitór, estudante Ensinu Báziku terseiru siklu to’o iha Ensinu Sekundáriu ninia matéria barak maka presiza asesu iha internet sira.

“Tanba ne’e, IOB sujere bele fornese mós ba estudante nível Báziku sira atubele asesu hotu,” nia tenik.

Nune’e mós, Reitór Universidade Orientál Timor-Lorosa’e (UNITAL), Florindo Pereira, konfesa iha tinan kotuk sira simu ona fornesimentu rede internet tanba situasaun COVID-19.

“Ida-ne’e de’it mós universidade la asesu másimu tanba problema liña todan liu. Bainhira ministériu hakarak kontinua apoiu filafali universidade sira, ha’u sujere hasa’e ninia velosidade atubele fasilita di’ak liután dosente no estudante sira,” nia dehan.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here