Kapela mahein Santa Lúcia, Nunuhenu iha Rejiaun Administrativa Espesiál Oé-Cusse Ambeno. Imajen mídia ZEEMS.

OÉ-CUSSE, 18 maiu 2022 (TATOLI) – Konstrusaun projetu turizmu kulturál iha Nunuhenu, aldeia Noeninen, suku Cunha, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA), daudaun ne’e atinje 38%.

Fatin turízmu kulturál Nunuhenu, koñesida nu’udar fatin istóriku iha rejiaun ne’e, tanba bainbain halibur komunidade no juventude sira mai hosi lokál, nasionál no internasionál inklui partidu politíku uza fatin ne’e hodi sunu-lilin husu matak-malirin, husu perdaun ba moris nian.

Nune’e mós fatin ne’e nu’udar prezensa Igreza Katólika mai Timor-Leste liuhosi odamatan Lifau, no misionáriu sira fó sarani batizmu relijiaun Katólika dahuluk iha Nunuhenu, nune’e dezde bei-ala sira hosi jerasaun ba ba jerasaun, sempre halo serimónia kulturál.

Tan ne’e iha 2021, autoridade RAEOA lideradu, Arsénio Paixão deside konstrui infraestrutura sira hanesan, konstrusaun kapela, moru, portaun, postu seguránsa no fasilidade sanitária.

Koordenadora Unidade Ordenamentu Territóriu Kadastru, Sónia Maria Daos, ne’ebé tutela iha Gabinete Prezidente Autoridade, informa, konstrusaun fatin turístiku kulturál Nunuhenu, sei iha tinan ne’e tanba daudaun ne’e nia propgresu atinje ona 38%.

“Semana kotuk ita hamutuk ho tékniku sira, ita halo fiskalizasaun atu haree obra ne’e nia mudansa oinsá ona, entaun ita observa nia serbisu tomak atinje ona 38%, ne’ebé tuir kontratu, empreza sei konklui iha tinan ne’e, tanba fatin ne’e importante ba povu Oé-Cusse,” Sónia Daos, hateten iha Oé-Cusse, kuarta ne’e.

Objetivu hosi vizita ne’e hodi fó atensaun ba empreza hanesan ezekutadór, nune’e bele kontrola nafatin kualidade obra nomoos aselera prosesu konstrusaun hodi finaliza tuir tempu ne’ebé determina ona iha kontratu.

Purtantu, fatin turistiku kulturál ne’e área luan 223,713 m2, ne’ebé kontrui konstrusaun hanesan kapela, hariis-fatin, postu seguransa-rua (2) inklui moru, no obra ne’e envolve direita komunidade-sira nu’udar traballadór.

Entretantu, área ba konstrusaun fatin istóriku turízmu kulturál ne’e, hamutuk ektare 22, área semitériu inklui kapela 4.760 m2, no medida ba konstrusaun kapela 15×12 no 7×24 m2.

Ba hariis-fatin unidade rua ho nia medida metru 3×6 ho totál área 18 m2, no postu seguransa unidade rua ho nia medida metru 2,5×2,5 ho totál área 6,25 m2. Nune’e kompleta ho lutu haleu fatin istória ne’e, kilómetru 1,870, inklui portaun unidade rua, ida nia medida metru 11, ida seluk metru 6,5, nomoós dreinajen.

Kontrusaun ba projetu turizmu kulturál ne’e ezekuta hosi empeza Grand Enclave Unipesoál Lda, ho valór kontratu $440,843.10, ne’ebé prevee hosi Orsamentu Jerál Estadu (OJE) 2021.

Notísia relevante: Fatin simu sakramentu batizmu dahuluk iha RAEOA, transforma ba turizmu kulturál

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here