iklan

Uncategorized

Preparasaun selebrasaun 20 maiu iha Bobonaro besik finaliza

Preparasaun selebrasaun 20 maiu iha Bobonaro besik finaliza

Prezidente Komisaun Organizador 20 maiu iha munisípiu Bobonaro, João Fátima do Carmo. Imajen Tatoli/Sérgio da Cruz.

BOBONARO, 18 maiu 2022 (TATOLI) – Prezidente Komisaun Organizadora, João Fátima do Carmo, fó-sai katak preparasaun ba selebrasaun loron restaurasaun independénsia 20 maiu ba dala-XX iha munisípiu Bobonaro ne’ebé realiza iha kampu futeból Maliana besik finaliza.

Nia dehan, hahú ne’e Komisaun Organizadora realiza hela enxaiu hanesan preparasaun ikus ba korpu hasa’e bandeira nasionál, grupu drum band hosi eskola Tékniku Vokasionál (TEKVOK) númeru II Malibaca, Yamato, Maliana, koru inu nasionál Pátria Pátria ne’ebé sei dirije hosi eskola CAFE Maliana.

Nune’e mós atvidade formatura parada Pelutaun rua hosi Polísia Nasionál Timor-Leste (PNTL)  kompostu hosi mane ho feto, Bombeiru, Seguransa sivíl, funsionariu públiku no estudante eskola sekundáriu jerál (ESG) númeru I, Don Martinho da Costa Lopes Maliana, Koléjiu Infantre de Sagres Maliana no TEKVOK númeru II Malibaka, Yamato, Maliana.

Alende ne’e komisaun mós halo hela dekorasaun palku ba inspetór serimónia no bainaka importante ne’ebé mai partisipa.

“Ami ohin hahú enxaiu iha dadeer ne’e kedas to’o agora, ami-nia preparasaun ita bele dehan katak 90%, agora ami haka’as to’o orsida lokraik ita bele 100%,” nia informa ba Tatoli, iha Jináziu Maliana, kuarta ne’e.

Atuál Sekretáriu Autoridade Munisípiu Bobonaro ne’e akresenta, hela de’it loron rua tama ona ba selebrasaun loron importante ne’e, tanba ne’e nia apela ba administradór postu administrativu neen atu orienta lideransa komunitária sira partisipa iha serimónia ne’e iha nível munisípiu no nível postu.

Sekuénsia programa ne’ebé komisaun organizadora trasa ona katak, loron-kinta dadeer, tuku 08:00 sei realiza misa agradesimentu iha Igreja Parókia Santa Cruz Maliana, nune’e 20 maiu  realiza serimónia hasa’e bandeira nasionál sei prezide hosi Vise Ministru Agrikultura no Peska (MAP), Abílio Xavier Araújo, no sei partisipa hosi veteranu no entidade importante iha munisípiu ne’e.

“Ita hotu tenke partisipa másimu iha komemorasaun loron importante ne’e, tanba festa ida-ne’e ita povu nian, tanba ne’e husu ba komunidade hotu ein-jerál hotu-hotu tenke hola-parte tanba orsida lokraik ita sei realiza feira kiik ida,” nia apela.

Tema ba komemorasaun 20 maiu tinan ne’e mak ”Liuhosi komemorasaun tinan 20 restaurasaun independénsia mai ita hametin pás no establidade hodi dezenvolve ita-nia rai Timor-Leste”.

Orsamentu ne’ebé autoridade munisípiu Bobonaro prevee ba komemorasaun 20 maiu tinan ne’e totál $ 17,640,50. Hosi montante ne’e aloka ba seksaun 11, postu administrativu sira sei hetan rihun $1 no kada suku hetan $750.

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!