Prezidente Repúblika eleitu períodu 2022-2027, Jose Ramos Horta. Imajen Tatoli /Egas Cristóvão.

DILI, 18 maiu 2022 (TATOLI)—Prezidente Repúblika eleitu, José Ramos Horta, agradese ba VIII Governu Konstitusionál ne’ebé ho inísiativa realiza misa agradesimentu ba selebrasaun 20 maiu ba dala-XX no serimonia investidura ne’ebé sei hala’o iha 19 maiu 2022.

“Ha’u nu’udar sarani no Prezidente Repúblika eleitu agradese inisiativa ne’ebé sai hanesan tradisaun ona. Kada eventu nasionál halo misa agradesimentu ba Nai Maromak, nune’e fó bensaun ba rai Timor-Leste no povu tomak,” José Ramos Horta hateten ba jornalista sira, hafoin partisipa misa agradesimentu ba selebrasaun 20 maiu no serimónia investidura ba Prezidente eleitu, iha Igreja Katedrál, Díli, kuarta ne’e.

Prezidente Repúblika eleitu períodu 2022-2027 ne’e, kontente no rona mós Amo Papa Francisco nia reprezentante iha ne’e tanba Amo Papa mós simu ona informasaun katak desizaun Parlamentu Nasionál deside atu apoiu adota deklarasaun pás mundiál ka fraternidade umana hodi kontinua follow up ho Governu atu haree oinsá deklarasaun ne’e adapta ba kurríkulu eskolár.

“Intensaun ne’e, atu sosiedade tomak no jerasaun hotu-hotu bele hakle’an liután ita-nia fiar ba dame, ba solidaridade no ba fraternidade,” José Ramos Horta hateten.

Ministru Administrasaun Estatál (MAE), Miguel Pereira de Carvalho, hateten misa agradesimentu ne’e parte ida hosi programa sira hodi selebra eventu importante ne’ebé sei realiza iha fulan-maiu liu-liu serimónia investidura Prezidente Repúblika eleitu no komemorasaun loron restaurasaun independénsia Timor-Leste ba dala-XX.

“Ida-ne’e importante tebes atu ita agradese ba Nai Maromak, ba eroi sira no ba funu-na’in sira ne’ebé luta ba rai ne’e. Purtantu, iha serimónia ida-ne’e, ohin ita bele rona amu bispu ko’alia ba sarani sira hotu no ba povu Timor-Leste tomak kona-bá progresu dezenvolvimentu iha ita-nia rain, saida mak ita halo ona no saida mak ita presiza halo tan,” nia hateten.

Aleinde ne’e, amu bispu mós fó parabéns ba Governante sira no dezafia nafatin atu bele halo di’ak liután ba iha ita-nia povu sira, entaun misa agradesimentu ne’e importante tebes atu agradese ba Nai Maromak no povu ne’ebé durante ne’e sai na’in ba rai ida-ne’e no presiza kontinua nafatin halo dezenvolvimentu.

Arsebispu Arkidioseze Metropolitana Dili, Don Virgílio do Carmo da Silva, SDB, parabeniza povu Timor-Leste, Governu no Komisaun Organizadora, tanba Timor-Leste selebra tinan 20 ba loron restaurasaun independénsia Timor-Leste (20 maiu 2022).

“Entaun, ohin ita-nia selebrasaun independénsia tinan 20 ne’e, ita Nai Ulun sira no povu hatudu duni katak furak ba ita atu hahú rekoñese grasa no favór hotu ne’ebé ita simu hosi Nai Maromak, molok ita hakat ba iha aban loron ne’ebé aas liután. Maibé, ita-nia selebrasaun ohin hanesan konvite hatudu katak ita-nia selebrasaun fahe ba parte dahuluk mak realiza ho Eukáristia Santu, serimónia investidura PR eleitu iha Tasi-Tolu no Isár Bandeira iha 20 maiu 2022. Entaun, ba ha’u sente furak tanba iha ita-nia selebrasaun Eukáristia la’ós de’it kuantidade, tanba ema barak, maibé liu-liu ita-nia membru Governu, Deputadu no Nai Ulun sira barak ne’ebé mai misa atu reza hamutuk,” Amo bispu hateten.

Tuir Don Virgílio, tempu ne’e la’ós de’it halo festa maibé tempu ida atu hamutuk hasa’e obrigadu ba Maromak ba di’ak hotu ne’ebé simu ona tanba aniversáriu loron restaurasaun ne’e momentu ida ba orasaun, momentu ida reflesaun no momentu ida ba renovasaun.

“Ita la’ós reza de’it, ita la’os refleta de’it maibé reza ba Maromak loke ita-nia fuan atu timor-oan hotu-hotu kompromete nia an, hakaas aan hola konsiénsia ida katak hakarak timor ida-ne’ebé di’akliu, ita hotu tenke kontribui ba Timor nia di’ak,” amululik Salesiano ne’e hateten.

Ne’e hatudu katak, timor-oan hotu tenke halo buat ruma, laiha ema ida mak iha ne’e kompete Governu nian de’it no kompete Igreja nian, maibé timor-oan hotu hahú hosi labarik, joven, inan no aman, familia iha papél ida atu kontribui ba konstrusaun país ida-ne’e nian.

“Tanba ne’e, loron ne’e bolu loron ida orasaun, reflesaun no renovasaun,” nia hateten.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here